हामी सबैकाे संसारन्यूज

१५ असार, काठमाण्डौं । सरकारले ‘धान उत्पादनमा वृद्धि,आत्मनिर्भरता र समृद्धि’ भन्ने नारासहित सोमबार राष्ट्रिय धान दिवस मनाउने तयारी गरिहँदा यो वर्ष ११ महिनामा करिब ३१ अर्ब रुपैयाँको चामल आयात भएको छ ।

कुनैबेला चामल निर्यात गर्ने नेपालमा धानको उत्पादन र उत्पादकत्व हुन नसक्दा बर्सेनी धान चामल आयात भइरहेको छ ।

यो वर्ष सात लाख १५ हजार क्विन्टल चामल आयात भएको भन्सार विभागले जनाएको छ । विभागको तथ्यांक अनुसार जेठसम्म ३० अर्ब ८२ करोड ५८ लाख ७७ हजार रुपैयाँको चामल आयात भएको छ । सरकारले कृषि उत्पादन वृद्धि गर्न मल, बीउ, उपकरण र अनुदान व्यवस्था गरेर उत्पादन बढाउने बताउँदै आए पनि परिणाम नदेखिएको पनि सोमबारको नागरिक दैनिकमा समाचार छ ।

सिँचाइ मल र बीउ अभाव, गुणस्तरीय बीउ प्रतिस्थापन दर न्यून, माटोमा प्रांगारिक पदार्थ न्यून भई उर्वराशक्ति कमजोर हुनु र सन्तुलित मलखादको अभावले उत्पादकत्व वृद्धि हुन नसकेको धान विज्ञ भोलामान सिंह बस्नेत बताउँछन् ।