हामी सबैकाे संसारन्यूज

काठमाडौं । सत्तारुढ नेपाल कम्युनिष्ट पार्टी (नेकपा)को स्थायी समिति बैठक केही बेर बसेर स्थगित भएको छ । संघीय संसदमा शोक प्रस्ताव पारित गर्ने कार्यक्रम तय भएको हुँदा बैठक स्थगित भएको हो । नेपाली कांग्रेसकी सांसद ज्ञानकुमार छन्त्यालको बुधबार बिहान सहिद गंगालाल अस्पतालमा निधन भएको थियो ।

छोटो समय बसेको बैठकमा ५ जना स्थायी समिति सदस्यले बोलेका थिए । बैठकमा प्रधानमन्त्रीको अभिव्यक्ति र निर्वाचनमा आयोगमा नेकपा एमाले नामको पार्टी दर्ताको विषयमा छलफल चलेको थियो ।

निर्धारित एजेण्डामा छलफल चलिरहेको बेला प्रधानमन्त्रीको विवादास्पष्द भारत विरोधी अभिव्यक्तिका कारण मंगलबारको बैठक प्रभावित भएकाे थियो । यसबीच निर्वाचन आयोगमा पूर्व नेकपा एमाले नामको पार्टी दर्ताभएको जानकारी सार्वजनिक भएसँगै नेकपाको बैठकमा विवाद चुलिएको थियो ।

मंगलबारको बैठकमा बोल्ने १८ जना नेताहरुको प्रधानमन्त्री ओलीलाई पार्टी र सरकारबाट राजीनामा दिन माग गरेका थिए । नेताहरुले ओलीको अभिव्यक्ति र कार्यशैलीले पार्टीको शाख गिरेको भन्दै राजीनामा दिनुको विकल्प नरहेको बताएका थिए ।

यसबीच सत्तारुढ नेकपाभित्र समुह समुहमा छलफल भएको थियो । बुधबार बिहानै प्रधानमन्त्री ओलीले आगामी रणनीतिबारे आफुँ निकटका मन्त्रि र स्थायी समिति सदस्यसँग छलफल गरेका थिए ।

जनाइएअनुसार आजको बैठकमा ओली पक्षीय स्थायी समिति सदस्यहरुले आफ्नो भनाई राख्नेछन् ।