हामी सबैकाे संसारन्यूज

काठमाडौं । पार्टीभित्र देखिएको विवाद समाधानका लागि सत्तारुढ नेपाल कम्युनिष्ट पार्टी (नेकपा)का अध्यक्षद्वय केपी शर्मा ओली र पुष्पकमल दाहाल ‘प्रचण्ड’बीच निर्णायक वार्ता सुरु भएको छ । अध्यक्षद्वयबीच प्रधानमन्त्री निवास बालुवाटारमा वार्ता सुरु भएको नेकपा स्रोतले जनाएको छ ।

बालुवाटारमा भएको छलफलमा पार्टी महासचिव विष्णु पौडेल र स्थायी समिति सदस्य जर्नादन शर्मा पनि सहभागि भएको जनाइएको छ ।

जनाइएअनुसार पार्टी विवादको समाधानका लागि मध्यमार्गी बाटोका बारेमा अध्यक्षद्वयबीच छलफल भईरहेको छ । पार्टीका दोस्रो तहका नेताले पनि पार्टीलाई फुटबाट जोगाउने गरि मध्यमार्गी धाराबाट छलफल गर्न आग्रह गरेका थिए ।

अध्यक्षद्वयबीचको छलफलमा पार्टी महासचिव विष्णु पौडेलले समन्वयकारी भूमिका खेलिरहेको बताइएको छ ।

स्थायी समिति बैठक चलिरहेका बेला बिहिबार एकाएक संघीय संसदको बैठक स्थगन गर्दै अध्यादेश ल्याउने तयारी गरिएपछि नेकपाभित्रको आन्तरिक विवाद वार कि पारको अवस्थामा पुगेको छ । स्थायी समितिका ३० सदस्यले प्रधानमन्त्रीसमेत रहेका अध्यक्ष ओलीलाई पार्टी र सरकारबाट राजीनामा माग्ने तयारी गरेसँगै उनले संसद स्थगन गर्दै अध्यादेशको तयारी गरेका थिए ।