हामी सबैकाे संसारन्यूज

काठमाडौं । सत्तारुढ नेकपाभित्रको विवाद उत्सर्गमा पुगिरहेको बेला पार्टीका दोस्रो तहका नेताहरुले सक्रियता बढाएका छन् । नेताहरुले विवाद समाधान गर्दै पार्टी विभाजनबाट रोक्न प्रयाससमेत थालेका छन् ।

यसैबीच शीर्ष तहमा पार्टी विवादमा समाधानका प्रयास भईरहेका बेला दोस्रो तहका नेताहरु पनि विवाद समाधानका लागि बेग्ला बेग्लै भेला तथा छलफलसमेत सुरु गरेका छन् ।

दोस्रो तहका नेताको छुट्टै भेला

शुक्रबार नेकपाभित्रका दोस्रो तहका केहि नेताहरुले छुट्टै भेलासमेत राखेका छन् । कृषी तथा पशुपंक्षीमन्त्री तथा नेकपाका स्थायी समिति सदस्य घनश्याम भुसालको सक्रियतामा शुक्रबार बिहान नेताहरुको भेला भएको हो ।

पुल्चोकस्थित भुसाल निवासमा भएको भेलामा तिनै समुहको प्रतिनिधित्व गर्ने नेताहरुको सहभागिता थियो । जनाइएअनुसार भेलामा केपी ओली पक्षका नेताहरु विष्णु रिमाल, शंकर पोखरेल र प्रदीप ज्ञवाली, प्रचण्ड पक्षका जनार्दन शर्मा, शक्तिबहादुर बस्नेत, वर्षमान पुन, टोपबहादुर रायमाझी र मणि थापा सहभागी थिए ।

त्यसैगरी भेलामा माधव नेपाल समुहका सुरेन्द्र पाण्डे, घनश्याम भुसाल र योगेश भट्टराई सहभागी थिए ।

यस्तो छ भेलाको निष्कर्ष

भेलाले पार्टीभित्र देखिएको आन्तरिक विवाद समाधान गर्न शीर्ष नेतृत्वलाई समाधानको सुत्रसहित खबरदारी गर्ने निर्णय गरेको छ । भेलामा सहभागी नेता मणी थापाले बताएअनुसार पार्टी विवाद अन्त्यको लागि शीर्ष नेतृत्वलाई निरन्तर दबाब दिँदै समाधानबारे पहलकदमी लिनेसमेत निर्णय गरेको छ ।

भेलाले पार्टीभित्रको सहमतीलाई परिपालनामा सबैको ध्यान जानुपर्ने निष्कर्षसमेत निकालेको उनले बताए । थापाले जनाएअनुसार भेलाले पार्टी एकतापूर्व र एकतापश्चात भएका सहमतीअनुसार पार्टीभित्रको विवाद खोजिनुपर्ने निष्कर्षसमेत निकालेको छ ।

भेलामा सहभागीले नेताहरुबीच आग्रह पूर्वाग्रह विनै सहमतीलाई परिपालना गराउँदै महाधिवेशनसम्म जाने विकल्प खोज्नुपर्ने बताएका थिए । विवाद बढिरहेका बेला प्रधानमन्त्रीसमेत रहेका पार्टी अध्यक्ष केपी शर्मा ओलीले आफ्नो पक्षमा माहोल सिर्जना गराउन थालेको प्रर्दशनलाई समेत रोक्नुपर्ने नेताहरुको धारणा छ ।

जनाइएअनुसार भेलाको निष्कर्षबारे नेता घनश्याम भुसालले अध्यक्षद्वय तथा शीर्ष नेतृत्वलाई जानकारी दिनेछन् ।