Sansar News
२२ असार, काठमाडौं । सेयरबजार मापक नेप्सेमा सोमबार हरियाली छाएको छ । सामुहिक लगानीकोष बाहेक सबै ११ वटा कम्पनीको सेयर मूल्य बढेपछि यस्तो अबस्था आएको हो । आज सुचिकृत भएका कूल कम्पनीमध्ये १७६ कम्पनीले ९२ करोड ७८ लाख ४१ हजार ३२९ रुपैयाँ बराबरको २७ लाख ३१ हजार ४९८ कित्ता सेयर किनबेच गरेका छन् ।
आजको कारोबारमा समग्र परिसूचक ३३.२७ अंकले बढेर १२९८.७३ अंकमा कायम भएको छ भने ठूला कम्पनीको कारोबार मापक सेन्सेटिभ पनि ६.३ अंकले उकालो लागेको छ ।
जीवन बीमा कम्पनी उपसूचक समूहका लगानीकर्ताहरुले सबैभन्दा धेरै २६६.४३ अंकले कमाए भने सामूहिक लगानी कोष उपसूचक समूहका लगानीकर्ताले सबैभन्दा धेरै ०.०६ अंकले गुमाएको नेप्सेले जनाएको छ ।
आज ग्लोबल आईएमई लघुबित्त(१२०), स्वदेशि लघु बित्त(७७), सूर्योदय लघुबित्त (६०) लगायतका लगानीकर्ताले राम्रो कमाई गरेका छन् भने बोटलर्स नेपाल (३६४), विशाल बजार कम्पनी (६३), स्वभिमान लघुबित्त(३२) लगायतका लगानीकर्ताले गुमाएका छन ।
करोबार रकमको आधारमा नेपाल पुनर्बीमा कम्पनी सबैभन्दा अगाडी रह्यो । उसको १४ करोड ५३ लाख ३१ हजार ३८० रुपैंयाँ बराबरको सेयर किनबेच भएको छ । करोबार संख्याको आधारमा प्रभु बैंक लिमिटेडको प्रमोटर सेयर सबैभन्दा बढी करोबार भएको छ । उसको ३ लाख ६७ हजार कित्ता सेयर किनबेच भयो । त्यस्तै नेपाल पुनर्बीमा कम्पनीको सेयर सबैभन्दा बढी ७४६६ पटक लेनदेन भएको छ ।
वि.सं.२०७७ असार २२ सोमवार १६:०८ मा प्रकाशित
