Sansar News
काठमाडौं । प्रधानमन्त्री केपी शर्मा ओलीसँग छलफल गर्न नेकपा अध्यक्ष पुष्पकमल दाहाल ‘प्रचण्ड’ बालुवाटार पुगेका छन् । पार्टीभित्र देखिएको विवादबारे छलफल गर्न उनी बालुवाटार पुगेका हुन् ।
नेकपा स्राेतले जनाएअनुसार प्रधानमन्त्री निवास बालुवाटारमा प्रधानमन्त्रीसमेत रहेका ओली र अर्का अध्यक्ष प्रचण्डबीच अहिले छलफल भइरहेकाे छ । यसअघि आइतबारमात्रै दाहालले आफुँ निकटका नेताहरुसँग छलफल गरेका थिए ।
उनले अर्का अध्यक्ष ओलीसँग कुनै सहमती नभएको भन्दै नेताहरुलाई आश्वस्त पारेका थिए । दाहालले वरिष्ठ नेता माधव नेपाल, झलनाथ खनाल र नारायणकाजी श्रेष्ठलगायतका नेतासँग प्रधानमन्त्रीसँगको सहमतीबारे स्पष्टीकरण दिएका थिए ।
शनिबारको सचिवालय बैठकमा प्रधानमन्त्री ओलीको अर्ली महाधिवेशन मंसिरमा गर्ने प्रस्तावप्रति समर्थन जनाएसँगै उनकाे आलोचना भएकाे थियाे । साथै सचिवालय बैठक लगत्तै राष्ट्रपति विद्यादेवी भण्डारीसँग दुई अध्यक्षको भेटप्रति नेताहरुले आशंका देखाएका थिए ।
गत असार १० देखि सुरु नेकपाको स्थायी समिति बैठक पार्टी विवादका कारण पटक–पटक स्थगित हुँदै आएको छ । पार्टी अध्यक्ष एंव प्रधानमन्त्री केपी शर्मा ओलीको राजीनामा मागिएसँगै नेकपामा विवाद चुलिएको थियो ।
वैवादकै कारण गत असार १८ देखि स्थायी समिति बैठक बस्न सकेको छैन् । सहमतीका लागि भन्दै बैठक अन्तिम समय स्थगित हुँदै आएको छ । यसअघि मिति तोकेर असार २०, २२, २४ र साउन २ मा बैठक स्थगित भएको थियो ।
वि.सं.२०७७ साउन ४ आइतवार १७:५३ मा प्रकाशित
