हामी सबैकाे संसारन्यूज

१२ साउन, काठमाण्डौं । नेपालमा सोमबार ( १२ साउन) सम्म पिसीआर प्रविधिबाट ३ लाख ४७ हजार २७५ वटा कोरोना भाइरसको नमुना परीक्षण गरिएको छ ।

जसमा पछिल्लो २४ घण्टामा पिसीआर प्रविधिबाट ४,८१६ वटा नमुना परीक्षण गरिएको स्वास्थ्य तथा जनसंख्या मन्त्रालयका प्रवक्ता जागेश्वर गौतमले सोमबार आयोजित नियमित पत्रकार सम्मेलनमा जानकारी दिएका छन् ।

त्यसैगरी हालसम्म देशका विभिन्न अस्पताल तथा आइसोलेशन सेन्टरहरुमा ४,९५० जनाको उपचार भइरहेको छ । साथै हालसम्म भारत लगायत विभिन्न देश र एक जिल्लाबाट अर्को जिल्लामा पुगेर क्वारेन्टिनमा बस्नेहरुको संख्या १६ हजार ३७९ रहेको छ । यो संख्या दिनप्रतिदिन घटिरहेको छ ।

आज थपिएका १३९ जनासँगै नेपालमा हालसम्म संक्रमितको संख्या १८ हजार ७५२ पुगेको छ भने आज निको भएर ६२६ डिस्चार्ज भएसँगै नेपालमा हालसम्म १३ हजार ७५४ जना कोरोना संक्रमणबाट मुक्त भएका छन् । साथै हालसम्म मृतकको संख्या ४८ पुगेको छ ।

आज १३९ जनामा कोरोना संक्रमण भएको पुष्टि
नेपालमा आज १३९ जनामा कोरोना संक्रमण पुष्टि भएको छ ।

स्वास्थ्य तथा जनसंख्या मन्त्रालयका अनुसार आज सबैभन्दा बढी दैलेखमा २८ जना, पर्सामा २० जना, सप्तरीमा २१ जना तथा धनुषा र महोत्तरीमा १०÷१० जना संक्रमित भेटिएका छन् ।

त्यस्तै बैतडीमा ४, ललितपुर ३, काठमाण्डौंमा ३ कास्कीमा ३, सल्यानका २, र सिराहा, काभ्रे, बाँके, रुपन्देही, सुर्खेत र जना गरी आज जम्मा १३९ जनामा संक्रमण पुष्टि भएको छ ।

आज थपिएका १३९ जनासँगै नेपालमा कोरोना संक्रमितको कूल संख्या १८ हजार ७५२ पुगेको छ । कुल संक्रमितमा हालसम्म १३ हजार ७५४ जना संक्रमण मुक्त भइसकेका छन् । बाँकी संक्रमितको विभिन्न अस्पताल तथा आइसोलेशन सेन्टरमा उपचार भइरहेको पनि मन्त्रालयले जानकारी दिएको छ ।

कुन प्रदेशमा कति छन् त सक्रिय संक्रमित ?
प्रदेश १ मा १९५, प्रदेश २ मा १९११ बाग्मति प्रदेशमा ४०२ गण्डकी प्रदेशमा २४४ प्रदेश नं ५ मा ३५३ कर्णाली प्रदेशमा ३७५ र सुदूरपश्चिम प्रदेशमा १,७४० जनाको विभिन्न अस्पताल तथा आइसोलेशन सेन्टरमा उपचार भइरहेको मन्त्रालयले जानकारी दिएको छ ।

नेपालमा आज ६२६ जना कोरोना संक्रमणबाट मुक्त
नेपालमा आज ६२६ जनाले कोरोनालाई जितेर घर फर्किएका छन् ।

स्वास्थ्य तथा जनसंख्या मन्त्रालयका अनुसार देशका विभिन्न अस्पताल तथा आइसोलेशनमा उपचाररत ६२६ जना संक्रमणबाट निको भएर घर फर्किएका हुन् ।
आज ६२६ जनानिकोभएसँगै नेपालमा कोरोना संक्रमणबाट निको हुनेको संख्या १३ हजार ७५४ पुगेको छ ।

हालसम्म कुन प्रदेशमा कति निको भए त ?
प्रदेश १ मा ७८९ प्रदेश २ मा २,९७२, बाग्मति प्रदेशमा ५१७, गण्डकी प्रदेशमा १२०४, प्रदेश नं ५ मा ३,९१०, कर्णाली प्रदेशमा १,६०८ र सुदूरपश्चिम प्रदेशमा २७५४ गरी जम्मा हालसम्म १३ हजार ७५४ जना निको भएका हुन् ।

यस्तो छ क्वारेन्टिनमा रहनेको विवरण
प्रदेश १ मा १८९९, प्रदेश २ मा २,१८० बाग्मति प्रदेशमा १,२०५, गण्डकी प्रदेशमा ३,४३६, प्रदेश नं ५ मा २,३०४ कर्णाली प्रदेशमा ८६३ र सुदूरपश्चिम प्रदेशमा ४,४८४ गरी जम्मा १६ हजार ३७१ जना विभिन्न क्वारेन्टिनमा रहेका छन् ।

कोरोना संक्रमणबाट आज तीनको मृत्यु, मृतकको संख्या ४८ पुग्यो
नेपालमा सोमबार एकैदिन ३ जनाको कोरोना संक्रमणबाट मृत्यु भएको पुष्टि भएको छ ।

स्वास्थ्य तथा जनसंख्या मन्त्रालयले दिएको जानकारी अनुसार आज पर्सानिवासी एक भारतीय नागरिक सहित धनुषा र बाराका गरी तीनजनाको मृत्यु भएको पुष्टि भएको हो ।

मन्त्रालयका अनुसार आज पर्साको विरगन्ज महानगरपालिका वडा नं १० निवासी ६५ वर्षीय भारतीय नागरिकको आइतबार (साउन ११ गते) विहान मृत्यु भएको हो ।
मुटु तथा मधुमेहका समस्या भएका उनको गण्डक अस्थायी कोभिड १९ अस्पताल वीरगन्जमा उपचारका क्रममा कोरानाका कारण निधन भएको हो ।

त्यस्तै धनुषा सहिन नगरपालिका वडा नं ८ डुमरियाका ३६ वर्षीय पुरुषको कोरोना संक्रमणका कारण मृत्यु भएको छ । ज्वरो तथा स्वास प्रस्वासमा समस्या भएपछि साउन १० गते प्रादेशिक अस्पताल जनकपुरको इमरजेन्सीमा उपचारका लागि पुगेका उनको आइसीयुमा राखेर उपचार गरिएको थियो । स्वास्थ्यमा सुधार नआएपछि थप उपचारका लागि वीपी कोइराला स्वास्थ्य विज्ञान प्रतिष्ठान धरानमा लैजादै गर्दा बाटोमै सोमबार (साउन १२ गते) मृत्यु भएको मन्त्रालयले जानकारी दिएको छ ।
त्यसैगरी बाराको फेटा गाउँपालिका वडा नं १ निवासी ६० वर्षीय पुरुषको पनि सोमबार (साउन १२ गते) कोरोना संक्रमणकै कारण मृत्यु भएको हो ।

त्रिवि शिक्षण अस्पताल महाराजगन्जमा उपचारका क्रममा उनको मृत्यु भएको हो । उनमा निमोनिया, मष्तिष्कघात र मिर्गौलाको समस्या भएको मन्त्रालयले जानकारी दिएको छ ।

आज पुष्टि भएका ३ जनासँगै नेपालमा कोरोना संक्रमणबाट मृत्यु हुनेको संख्या ४८ पुगेको छ ।

हेर्नुहोस् यस्तो छ नेपालमा साउन ११ सम्मको कोरोना भाइरस अपडेटको पूर्ण विवरण