Sansar News
काठमाडौं । सत्तारुढ नेकपाभित्र किचलो बढ्दै गएका बेला केन्द्रीय समितिका एक चौथाई सदस्यहरुले केन्द्रीय समितिको बैठक बोलाउन हस्ताक्षर संकलन गरेका छन् । पार्टी अध्यक्ष पुष्पकमल दाहाल ‘प्रचण्ड’ र वरिष्ठ नेता माधवकुमार नेपाल समुहका केन्द्रीय सदस्यहरुले हस्ताक्षर संकलन गरेका हुन् ।
नेकपा केन्द्रीय सदस्य ठाकुर गैह्रेले जानकारी दिएअनुसार पार्टी विवादको निकास खोज्न हस्ताक्षर संकलन गरिएको हो । केन्द्रीय समिति बैठक बोलाउन हस्ताक्षर पर्याप्त संकलन भईसकेको उनले जनाए ।
‘हामी स्थायी समितिको निर्णयको प्रतिक्षामा छौं, स्थायी समितिबाटै निकास होस् भन्ने हाम्रो चाहना हो तर, अवस्था सहज देखिएको छैन्’, नेता गैह्रेले भने, ‘विवादको निकास खोज्नैपर्छ, त्यसैको लागि हस्ताक्षर जुटाइएको हो ।’
उनले जनाएअनुसार मंगलबारको स्थायी समिति बैठकले निर्णय नलिए बैठक बोलाउन जुटाइएको हस्ताक्षरको प्रयोग हुनेछ ।
हाल नेकपाको केन्द्रीय कमिटी ४ सय ४४ जनाको छ । केन्द्रीय कमिटी बैठक बोलाउन एक चौथाई अर्थात् १ सय १२ जना सदस्यको हस्ताक्षर आवश्यक रहन्छ । नेकपाको विधानमा एक चौथाई सदस्यले हस्ताक्षरमार्फत बैठकको माग गरेमा बैठक एक महिनाभित्र बोलाउनु पर्ने बाध्यकारी व्यवस्था छ ।
नेकपाभित्र विवाद बढ्दै जाँदा ठाकुर गैह्रे, रामकुमारी झांर्की, लेखनाथ न्यौपाने, जगन्नाथ खतिवडालगायतका नेताहरुले पार्टी कार्यालयमा धर्ना तथा विवादको समाधानका लागि शीर्ष नेताहरुलाई दबाब दिने कार्यक्रम गरिरहेका छन् ।
असार १८ देखि लगातार बैठक स्थगित
गत असार १० देखि सुरु स्थायी समिति बैठकमा दुई तिहाई सदस्यले प्रधानमन्त्री केपी शर्मा ओलीको राजीनामा माग गरेसँगै नेकपाभित्र विवाद चुलिएको छ । विवादकै बीच स्थायी समिति बैठक पनि पटक–पटक स्थगित हुँदै आएको छ ।
विवाद समाधानका लागि भन्दै असार १८ देखि लगातार बैठक स्थगित हुँदै आएको छ । यो बीचमा बैठक ८ पटकसम्म स्थगित भईसकेको छ । सहमतीका लागि भन्दै यसअघि असार २०, २२, २४, २६ र साउन २ र ४ मा स्थगित भएको थियो ।
गत साउन ६ मा बसेको स्थायी समिति बैठक पनि एजेण्डामै प्रवेश नगरी स्थागित भएको थियो । साउन ६ मा बसेको बैठकले साउन १३ अर्थात् भोलीको लागि बैठक बोलाएको छ ।
सम्बन्धित समाचार
वि.सं.२०७७ साउन १२ सोमवार १८:१४ मा प्रकाशित
