हामी सबैकाे संसारन्यूज

१९ साउन, काठमाडौँ । जनप्रतिनिधि र कर्मचारीमा कोरोना संक्रमण पुष्टि भएपछि नेपालगन्ज उपमहानगरपालिका कार्यालय पूर्ण रुपमा सिल गरिएको छ ।

उपमहानगरपालिकाका प्रमुख प्रशासकीय अधिकृत ओमबहादुर खड्काद्वारा जारी सूचनामा बाँके जिल्लामा पनि उच्च जोखिममा रहेको अवस्थामा यस उपमहानगरपालिकामा कार्यरत केही जनप्रतिनिधि तथा कर्मचारीहरुमा कोरोना भाइरसको संक्रमण पुष्टि भएकोले अर्को सूचना नभएसम्मका लागि कार्यालय पूर्णरुपमा सिल गरिएको जनाइएको छ ।

आज बाँकेको नेपालगञ्ज उपमहानगरपालिकाका कार्यकारी अधिकृत र एक जना वडाध्यक्षलाई कोरोना भाइरसको संक्रमण पुष्टि भएको थियो ।

भेरी अस्पताल नेपालगन्जमा सोमबार गरिएको कोरोना परीक्षणमा उपमहानगरपालकिाका कार्यकारी अधिकृत र एक जना वडाध्यक्षलाई कोरोनाको संक्रमण पुष्टि भएको हो ।

पछिल्लो २४ घण्टामा १९५ जनाको पीसीआर विधिबाट परीक्षण गर्दा ९ जनामा भाइरस संक्रमण देखिएको भेरी अस्पतालले जनाएको छ ।

बाँकेमा अहिलेसम्म ४ सय ४६ जनामा कोरोनाको संक्रमण पुष्टि भएको छ । तीमध्ये ३ सय ८८ जना कोरोनालाई जितेर घर फर्किसकेका छन् ।