हामी सबैकाे संसारन्यूज

१६ पुस, धनगढी  । राष्ट्रिय प्रजातन्त्र पार्टीका अध्यक्ष कमल थापाले व्यवस्थापिका–संसद्मा दर्ता भएको संविधान संशोधनको विधेयकलाई यथास्थितिमा समर्थन गर्न नसकिने बताउनुभएको छ ।

आज यहाँ आयोजित पत्रकार सम्मेलनमा थापाले दर्ता भएको विधेयकका केही दफा राष्ट्रहित विपरीत रहेको, प्रमुख प्रतिपक्षी दलले संसद् अवरुद्ध गरेको तथा मधेसी दल असन्तुष्ट रहेको अवस्थामा विधेयकलाई जस्तको तस्तै पारित गराउन गाह्रो हुने बताउनुभयो ।

विधेयकलाई तत्काल थाती राखेर सहमतिका लागि सरकारले अग्रसर हुनुपर्नेमा जोड दिनुभयो । संविधान संशोधनका लागि दलहरुबीच भइरहेका पछिल्ला वार्ताले समस्या समाधान गर्नेभन्दा पनि देश मुठभेडतर्फ जाने सम्भावना देखिएकोे उहाँले दाबी गर्नुभयो ।

भोलि आइतबार महेन्द्रनगरमा हुने राप्रपाको क्षेत्रीय भेलालाई सम्बोधन गर्न अध्यक्ष थापा, राष्ट्रिय अध्यक्ष पशुपतिशम्शेर राणा, आपूर्ति मन्त्री एवम् राप्रपाका नेता दीपक बोहरालगायतका नेता आज यहाँ आउनुभएको हो । रासस