हामी सबैकाे संसारन्यूज

काठमाडौं । भारतीय अभिनेता सञ्जय दत्त क्यान्सरको उपचारको लागि अमेरिका जाने तयारीमा छन् । दत्तको पारिवारिक स्रोतले सञ्चार माध्यमलाई बताएअनुसार उनी छिट्टै उपचारको लागि अमेरिका जानेछन् ।

तर, यहीबीच २७ वर्ष पुरानो मुम्बई बम काण्ड उनको लागि बाधा पर्ने अनुमान गरिएको छ । बम विस्फोट काण्डमा जोडिएको उनको नामले उनलाई अमेरिका भ्रमणमा नै समस्या पार्नेछ ।

उनलाई सन् १९९३ मा मुम्बई बम काण्डपछि ‘एके–फिप्टी सिक्स’ हतियारसहित प्रहरीले पक्राउ गरेको थियो । जसमा सञ्जयमाथिको अभियोग प्रमाणित भएपछि उनलाई ५ वर्ष जेल सजायसमेत दिइएको थियो ।

उनीमाथि अन्डरवल्र्ड डन अबु सलेम र रियाज सिद्दिकीबाट अवैध बन्दुकको डेलिभरी लिएको, त्यसलाई राखेको र पछि नष्ट गरेको अभियोग लगाइएको थियो । उनको घरमा भेटिएका हतियार बमजस्ता प्रमाणहरुको आधारमा उनलाई एक महिनापछि प्रहरीले पक्राउ गरेको थियो ।