हामी सबैकाे संसारन्यूज

काठमाडौं । जनस्वास्थ्य विद् डा. रवीन्द्र पाण्डेले आगामी तीज र कुशे औंशीले पनि कोरोना संक्रमण बढाउन सक्ने बताएका छन् । तीजको अवसरमा आफन्तहरुका बीच दरखाने तथा भेटघाट गर्ने क्रम बढ्दा कोरोना संक्रमण बढ्न सक्ने पाण्डेले बताएका हुन् । उनले कुशे औंशीमा खानेकुरा तथा उपहार बोकेर बुबालाई भेट्न नजान आग्रह गरेका छन् ।

जनस्वास्थ्य विद् पाण्डेले अहिलेको तीज रेडियोबाट सुन्न र टेलिभिजनबाट हेर्न आग्रह गरेका छन् । ‘अहिले हामी कोरोना संक्रमणको महामारीमा छौं, हाम्रो ठाउँमा पनि संक्रमित धेरै छन्, को संक्रमित हो तथा को होइन भनेर परीक्षण नगरि थाहा हुँदैन, तसर्थ यसपटकको तीजमा दिदीबहिनी जम्मा हुने, नाचगान गर्ने तथा दर खाने गतिबिधि नगर्नुहुन हार्दिक अनुरोध गर्दछु’ सामाजिक सञ्जाल फेसबेकमा उनले भनेका छन्, ‘त्यस्तै दर खाने नाममा अपच हुनेगरि गरिष्ठ भोजन सेवन गरेमा अम्लपित्त बढेर तथा झाडावान्ता भएर अस्पताल जानुपर्यो भने अर्को जोखिम हुनेछ, हल्का र सधैझैँ सामान्य खाना खाने गरौँ, दरले डर हुन्छ, घरभित्र बसेर गीत गाउँदा कुनै व्यक्ति संक्रमित छ भने उसले सबैजनालाई संक्रमण सार्न सक्छ, यसपटक टेलिभिजन तथा रेडियोमा तीज सुनौं र हेरौं ।’

उनले कुशे औंशीमा बृद्ध भईसकेका बाआमालाई भेटेर संक्रमण नबढाउन आग्रह गरेका छन् । बृद्ध भईसकेकालाई कोरोनाको जोखिम हुनसक्ने भन्दै उनले अहिलेको कुशेऔंशी नभेटी मनाउन आग्रह गरेका छन् ।

‘कुशे औंशीमा बजारमा पाइने खाने कुरा तथा उपहार बोकेर बुवालाई भेट्न सकभर नजानुहोला, हामी संक्रमित हुनसक्छौं, हामीलाई संक्रमणले असर नगरेपनि बुवाआमा जेष्ठ नागरिक हुनुहुन्छ, उहाँहरुमध्ये धेरै जना औषधिसेवी हुनुहुन्छ, संक्रमण सर्यो भने उहाँहरुलाई जोखिम हुनसक्छ ’ उनले लेखेका छन्, ‘यसपटक फोन वा भर्चुवल माध्यमद्वारा शुभकामना तथा आशिर्बाद आदानप्रदान गरौँ ।’

यस्तो छ उनले लेखेको स्टाटस

अहिले हामी कोरोना संक्रमणको महामारीमा छौं । हाम्रो ठाउँमा पनि संक्रमित धेरै छन् । को संक्रमित हो तथा को होइन भनेर परीक्षण नगरि थाहा हुँदैन । तसर्थ यसपटकको तीजमा दिदीबहिनी जम्मा हुने, नाचगान गर्ने तथा दर खाने गतिबिधि नगर्नुहुन हार्दिक अनुरोध गर्दछु । त्यस्तै दर खाने नाममा अपच हुनेगरि गरिष्ठ भोजन सेवन गरेमा अम्लपित्त बढेर तथा झाडावान्ता भएर अस्पताल जानुपर्यो भने अर्को जोखिम हुनेछ । हल्का र सधैझैँ सामान्य खाना खाने गरौँ । दरले डर हुन्छ । घरभित्र बसेर गीत गाउँदा कुनै व्यक्ति संक्रमित छ भने उसले सबैजनालाई संक्रमण सार्न सक्छ । यसपटक टेलिभिजन तथा रेडियोमा तीज सुनौं र हेरौं ।

त्यस्तै कुशे औंशीमा बजारमा पाइने खाने कुरा तथा उपहार बोकेर बुवालाई भेट्न सकभर नजानुहोला । हामी संक्रमित हुनसक्छौं । हामीलाई संक्रमणले असर नगरेपनि बुवाआमा जेष्ठ नागरिक हुनुहुन्छ । उहाँहरुमध्ये धेरै जना औषधिसेवी हुनुहुन्छ । संक्रमण सर्यो भने उहाँहरुलाई जोखिम हुनसक्छ ।

यसपटक १ जना पाहुनालाई समेत घरमा बोलाउने काम नगरौं, आफुपनि पाहुना भएर कतै नजाऔं । महामारीबाट मुक्ति मिलेपछि हरेक दिन चाडपर्व हुनेछन् । दिदीबहिनी वा चेलीबेटीलाई नबोलाए उनीहरुले के भन्छन् होला, बुवाआमालाई नभेट्दा उहाँहरुले के सोंच्नुहोला भनेर हामीले नसोचौं । महामारीको समयमा पाहुना नबोलाएमा वा आफुपनि नगएमा उहाँहरु खुसी हुनुहुनेछ ।

यसपटक फोन वा भर्चुवल माध्यमद्वारा शुभकामना तथा आशिर्बाद आदानप्रदान गरौँ ।