हामी सबैकाे संसारन्यूज

काठमाडौं । अमेरिकी राष्ट्रपति डोनाल्ड ट्रम्पले आफ्नो राजनीतिक यात्राको सुरुवाती कारण पूर्वराष्ट्रपति बाराक ओबामा भएको बताएका छन् । बिहिबार ह्वाइट हाउसमा सञ्चारकर्मीसँग कुराकानी गर्दै उनले ओबामा र पूर्वउपराष्ट्रपति जो बिडेनले गलत काम गरेको कारण आफुँ राजनीतिमा आएको बताए ।

ओबामा र बिडेनले राम्रो काम गरेको भए आफ्नो चुनाव नै लड्ने स्थिति नआउने भनाई ट्रम्पको छ । ‘पूर्वराष्ट्रपति ओबामा र पुर्वउपराष्ट्रपति जो बिडेनले राम्रो काम गरेनन्, यही कारण म आज तपाईंहरुको अगाडि राष्ट्रपतिको रुपमा छु’, ट्रम्पले भने, ‘यदि दुवैले राम्रो काम गरेको भए म यहाँ हुने थिइन्, हुनसक्थ्यो म राष्ट्रपतिको चुनाव नै लड्ने थिइन् ।’

जो बिडेन बाराक ओबामा राष्ट्रपति रहँदा आठ वर्षसम्म अमेरिकाका उपराष्ट्रपति रहेका थिए । यसपटकको राष्ट्रपति चुनावमा उनी उम्मेदवारका रुपमा उठेका छन् । उनी ट्रम्पको विरुद्व चुनावी मैदानमा छन् ।

ओबामाले ट्रम्पको आलोचना गरेका थिए

बिडेनको चुनावी कार्यक्रमअन्तर्गत बुधबार पूर्वराष्ट्रपति बाराक ओबामाले एक भिडियो जारी गरेका थिए । जसमा उनले ट्रम्पको कारण देश निराश बनेको बताएका थिए । उनले ट्रम्पमा राष्ट्रपतिमा हुने क्षमता नभएको पनि टिप्पणी गरेका थिए ।

ट्रम्पकै कारण १ लाख ७० हजार अमेरिकीले ज्यान गुमाएको र लाखौं बेरोजगार भएको आरोप ओबामाको छ । एजेन्सीबाट