हामी सबैकाे संसारन्यूज

काठमाडौं । इटलीमा लामो समयपछि फेरि ठूलो संख्यामा कोरोना संक्रमित फेला परेका छन् । अन्तराष्ट्रिय सञ्चार माध्यमले जनाएअनुसार शुक्रबार इटलीमा ९ सय ४७ जना कोरोना संक्रमित भेटिएका हुन् ।

जनाइएअनुसार शुक्रबारको आँकडा गत ३ महिना यताकै सबैभन्दा बढि हो । गत १४ मई यता इटलीमा नयाँ कोरोना संक्रमितको संख्या अति न्यून भेटिएको थियो ।

कोरोना संक्रमित ठुलो संख्यामा भेटिएसँगै इटली सरकारले विशेष जाँच सुरु गर्ने भएको छ । जनाइएअनुसार नयाँ संक्रमितका लक्षणबारे गहिरो अध्ययन गरिनेछ । जससँगै सरकारले नियन्त्रणका उपायबारे नयाँ रणनीति लिनेछ ।

फ्रेबुअरी तथा मार्चमा इटलीमा दैनिक ४/५ हजारको संख्यामा कोरोना संक्रमित भेटिएका थिए । मार्च २१ मा त्यहाँ एकै दिन ६ हजार ५ सयबढि कोरोना संक्रमित देखिएका थिए ।

कोरोना महामारीको कारण त्यस समय इटली निकै संकटमा पुगेको थियो । दैनिक हजारको संख्यामा कोरोनाकै कारण मानिसहरुको मृत्यु भएसँगै विश्वको ध्यान इटलीतिर तानिएको थियो ।

जुलाई सुरु भएयता इटलीमा कोरोना संक्रमणको अवस्था अति सामान्य बन्दै आएको थियो । तर, शुक्रबार हजारको हाराहारीमा कोरोना संक्रमित भेटिएसँगै त्यहाँ पुनः संकट सुरु हुनसक्ने अनुमान गरिएको छ ।

इटलीमा हालसम्म २ लाख ५७ हजार बढि कोरोना संक्रमित भेटिएका छन् । कोरोनाकै कारण त्यहाँ हालसम्म ३५ हजार ४ सय बढिले ज्यान गुमाएका छन् । एजेन्सीको सहयोगमा