Sansar News
८ भदौ, पर्वत । बिहादी गाउँपालिका वडा नं. २ बर्राचौरमा १५ श्ययाको सुविधा सम्पन्न अस्पताल निर्माण हुने भएको छ । अहिलेसम्म सदरमुकाम कुश्माबजारमा मात्र यस किसिमको अस्पताल रहेको थियो ।
बिहादी– २ का वडाध्यक्ष ओमप्रकाश कुँवरले रु.१९ करोड लगानीमा अस्पताल निर्माणको प्रक्रिया शुरुआत भएको जानकारी दिए । यसका लागि बोलपत्र आव्हान गर्ने प्रक्रियामा रहेको छ । सुविधासम्पन्न अस्पताल नहुँदा दक्षिण पर्वतबासी सामान्य उपचारका लागि पनि पाल्पा, पोखरा तथा बुटवल लगायतक ठाउँमा जान बाध्य थिए । उहाँले अस्पतालमा सबै सेवा रहने जानकारी दिनुभयो । उक्त क्षेत्र अहिलेपनि स्वास्थ्य चौकिको भरमा रहेको छ ।
अस्पताल बनाउनका लागि स्थानीय आठ जनाले निःशुल्क जग्गा दान गरेका छन् । उनीहरुमा डोलेन्द्र गिरी, भुपेन्द्रनाथ पौड्याल, इन्द्रकला पौड्याल, शुसिला गिरी, होमनाथ गिरी, राम गिरी, कृष्ण गिरी र खगेश्वर भट्टराईले रहेका छन् ।
सामाजिक सेवा गर्नु ठूलो कुरा भएको र आत्मसन्तुष्टिका लागि जग्गा दिएको जग्गा दाता डोलेन्द्रले बताए । उनले ४० लाख रुपैयाँ मुल्य बराबरको पाँच रोपनी जग्गा दान दिएका थिए ।
बर्राचौर स्वास्थ्य चौकिका प्रमुख भुपेन्द्रनाथ पौडेलले ग्रामीण ठाँउमा १५ श्ययाको विशेषज्ञ सेवा सहितको अस्पताल बन्नु खुशिको कुरा भएको जनाउँदै बिरामी पाल्पा र पोखरा लगायतका ठाउँमा धाउनु पर्ने बाध्यता अन्त्य हुने बताए ।
अस्पताल निर्माणपछि बिहादी र पैँयू गाउँपालिका सहित फलेवास नगरपालिकाका स्थानीय लाभान्वित हुनेछन् । साथै छिमेकी जिल्ला बाग्लुङको जैमिनी नगरपालिका र गुल्मीको कालीगण्डकी गाउँपालिकाका स्थानीयले समेत लाभ लिने जनाइएको छ ।
बिहादी गाउँपालिकाका अध्यक्ष कमल भुषालले विकट गाउँमा सुविधासम्पन्न अस्पताल निर्माण हुनु गौरवको कुरा भएको जनाए । सामान्य शल्यक्रिया तथा सुत्केरी हुन पनि पाल्पा, बुटवल, पोखरा जानुपर्ने बाध्यताको अन्त्य हुने उनले विश्वास व्यक्त गरे ।
“मानिसहरु स्वास्थ्य सेवाको अभावकै कारण बसाइसराइ गर्ने क्रम बढ्दो छ । अस्पताल बनेपछि यो क्रम केही रोकिनेछ” उनले भने, ‘दुईवर्षभित्र अस्पतालको निर्माण पुरा गर्न गाउँपालिकाले सहजीकरण गर्ने छ ।’
वि.सं.२०७७ भदौ ८ सोमवार १२:४२ मा प्रकाशित
