हामी सबैकाे संसारन्यूज

काठमाडौं । सत्तारुढ नेपाल कम्युनिष्ट पार्टी (नेकपा)का अध्यक्षद्वय केपी शर्मा ओली र पुष्पकमल दाहाल ‘प्रचण्ड’बीच बालुवाटारमा छलफल सुरु भएको छ । पार्टी विवाद समाधान गर्न गठित कार्यदलले बुझाएको प्रतिवेदनबारे दुई अध्यक्षबीच छलफल भईरहेको नेकपा स्रोतले जनाएको छ ।

गत साउन ३० मा गठित कार्यदलले शनिबार दुई अध्यक्षलाई प्रतिवेदन बुझाएको थियो । दुई अध्यक्षबीच छलफल भएपछि सचिवालय बैठकले प्रतिवेदनबारे निष्कर्ष निकाल्ने बताइएको छ । जनाइएअनुसार प्रतिवेदनबारे समान धारणा बनाउन दुई अध्यक्ष छलफलमा जुटेका हुन् ।

महासचिव विष्णु पौडेल नेतृत्वको कार्यदलले पार्टीभित्रको विवाद समाधानको लागि मध्यमार्गी बाटो सुझाएको छ । कार्यदलले प्रधानमन्त्री ओलीले राजीनामा दिनु नपर्ने र प्रचण्डले पूर्णं अधिकारसहित अध्यक्षको जिम्मेवारी लिने कुरा सुझावको रुपमा राखेको छ ।

कार्यदलले मन्त्रिपरिषद पुर्नगठन, पार्टी एकताका बाँकी कामलगायतका विषयमा पनि सुझाव दिएको छ । जनाइएअनुसार कार्यदलको प्रतिवेदन सचिवालयले पारित गरेपश्चात स्थायी समितिमा छलफल हुनेछ ।