हामी सबैकाे संसारन्यूज

काठमाडौं, २३ भदौ । काठमाडौं उपत्यकाका नगरपालिका मेयर फोरमले उपत्यका भित्रिने नाकाको जिम्मेवारी नेपाली सेनालाई दिनुपर्ने निर्णय गरेको छ ।

काठमाण्डौं उपत्यका नगरपालिका मेयर फोरमको सोमबार बसेको बैठकले बैठकपछि पत्रकार सम्मेलन गर्दै उपत्यका भित्रिने नाकाको जिम्मेवारी नेपाली सेनालाई दिनुपर्ने उपत्यकाका तीन वटा जिल्ला प्रशासन कार्यालयलाई सुझाव दिएको जनाएको छ । ।

फोरमले संक्रमणको अवस्था अझै कम नभएको निष्कर्ष निकाल्दै निषेधाज्ञाको स्थितिलाई भदौ १५ गते सम्म कायम गर्न र नाकामा उच्च सर्तकता र कडाई गर्न नेपाली सेनालाई जिम्मेवारी दिनुपर्ने निर्णय गरिएको जानकारी दिएको हो ।

बैठकले उपत्यकामा निषेधाज्ञा खुकुलो बनाउँदा सुरक्षा सतर्कता र स्वास्थ्य सुरक्षा मापदण्ड कार्यान्वयनमा कडाइ गर्नुपर्ने निर्णय पनि गरेको फोरमका सचिव तथा मध्यपुर थिमी नगरपालिकाका प्रमुख मदनसुन्दर श्रेष्ठले जानकारी दिएका छन् ।

बैठकले तत्कालका लागि सार्वजनिक यातायातलाई सञ्चालन गर्न नहुने निष्कर्ष पनि निकालेको छ भने नीजि सवारीसाधान सञ्चालन गर्दा जोरबिजोर प्रणाली लागू गर्नुपर्ने जनाएको छ ।

त्यस्तै सरकारको विरोध र समर्थनमा र्याली निकाल्ने, भेला, अनसन, जुलुस लगायतका गतिविधि गर्न निषेध गर्नुपर्ने र जात्रा तथा सांस्कृतिक गतिविधिमा समेत रोक लगाउनुपर्ने निर्णय पनि बैठकले गरेको मेयर श्रेष्ठले बताए ।

फोरमले बिहीवारदेखि उपत्यकाको वडा कार्यालयबाट सेवा सञ्चालन गर्ने निर्णय पनि गरेको छ ।

फाइल तस्विर