Sansar News
२८ भदौ, काठमाडौँ । प्रगतिवादी साहित्यकार चन्द्रा थानीको निधन भएको छ ।
पित्तथैलीको अप्रेसन गर्न भदौ १७ गतेदेखि मेडिसिटी अस्पतालमा भर्ना भएकी थानीको आइतबार अपरान्ह ४ बजे निधन भएको हो ।
२०१७ चैत्र १६ गते सुर्खेतमा जन्मिएकी थानी अखिल नेपाल जनसाँस्कृतिक महासंघको सचिवालय सदस्य, इच्छुक, साँस्कृतिक प्रतिष्ठानकी कार्यकारी सदस्य, अनेमसंघ(क्रान्तिकारी) की केन्द्रीय सहसचिव लगायतका विभिन्न जिम्मेवारी पुरा गर्दै आएकी थिइन् ।
तत्कालिन चौंथो महाधिवेशनबाट कम्युनिष्ट पार्टीमा आबद्ध भएकी थानी माओवादी हुँदै नेकपा(क्रान्तिकारी) को कर्णाली प्रदेश सदस्यको जिम्मेवारीमा रहेकी थिइन् ।
स्व. थानीको अन्त्यष्टि पशुपति आर्यघाटमा गरिएको छ । नेकपा (क्रान्तिकारी माओवादी) का महासचिव मोहन वैद्यले कम्युनिष्ट पार्टीको झण्डा ओढाइ श्रद्धाञ्जली मन्तव्य दिएका थिए । उनको अन्त्येष्टिमा सो पार्टीका स्थायी समिति सदस्य रामसिंह श्रीश, पोलिटब्यूरो सदस्य दिनेश शर्मा, पवनमान श्रेष्ठ सहित नेताहरु दिपक शाही शारदा महत, ईश्वर तिमिल्सिना, बसन्ता बोगटी, धनबहादुर पन्त, बन्धुदेव पाण्डे लगायतका नेता कार्यकर्ताको उपस्थिति रहेको थियो ।
स्व. थानीका जीवनसाथी चक्रपाणी शर्मा नेकपा(क्रान्तिकारी माओवादी)का पोलिट्ब्युरो सदस्य रहि कम्युनिष्ट आन्दोलनमा सक्रिय छन् भने उनका ३ छोरी र १ छोरी रहेका छन् ।
संसारन्यूज प्रकाशनका आत्मीय अभिभावक चक्रपाणी शर्मामा पर्न गएको यो दुखद् क्षणमा स्व. थानीप्रति हार्दिक श्रद्धाञ्जली तथा शोकसन्तप्त परिवारजनमा गहिरो समवेदना प्रकट गर्दछ ।
वि.सं.२०७७ भदौ २८ आइतवार २१:४३ मा प्रकाशित
