हामी सबैकाे संसारन्यूज

काठमाडौं । मन्त्रिपरिषदको नियमित बैठक आज बस्ने भएको छ । प्रधानमन्त्रीको सचिवालयले जनाएअनुसार बैठक साँझ ५ बजे बस्नेछ ।

नियमित भनिए पनि आजको बैठकले केहि महत्वपूर्णं निकायमा नियुक्तीको निर्णय लिने बुझिएको छ । बैठकले सत्तारुढ नेकपाका उपाध्यक्षसमेत रहेका नेता बामदेव गौतमको विषयमा निर्णय लिनसक्ने सम्भावना छ । गौतमलाई यसअघि नेकपा सचिवालय बैठकले राष्ट्रिय सभा सदस्यमा पठाउने निर्णय गरेको थियो ।

गत भदौ १८ मा बसेको सचिवालय बैठकले गौतमलाई राष्ट्रिय सभामा पठाउने विषयमा निर्णय गरेको थियो । तर, त्यसयता बसेको मन्त्रिपरिषद बैठकले भने गौतमको विषयमा छलफल गरेको छैन् ।

राष्ट्रियसभा सदस्यमा प्रधानमन्त्रीसमेत रहेका नेकपा अध्यक्ष केपी शर्मा ओलीले निर्वतमान अर्थमन्त्री युवराज खतिवडालाई नै दोहोर्याउने चाहना राख्दै आएका छन् ।

त्यस्तै आजको बैठकले विद्युत प्राधिकरणको कार्यकारी निर्देशक पनि नियुक्ती गर्दैछ । कुलमान घिसिङको कार्यकाल आइतबारदेखि सकिएको थियो ।

प्राधिकरणको नेतृत्वमा पनि घिसिङ्गलाई नै नियुक्ती गरिने सम्भावना छ । सत्तारुढ नेकपाका अध्यक्ष पुष्पकमल दाहाल ‘प्रचण्ड’ले घिसिङ्गको नियुक्तीमा दबाब दिईरहेका छन् भने सामाजिक सञ्जालमा पनि घिसिङ्गलाई नै नियुक्ती गरिनुपर्ने चर्को दबाब छ ।

उर्जा मन्त्रालय स्रोतले उल्लेख गरेअनुसार मन्त्रालयले पनि घिसिङ्गलाई नै नियुक्ती गर्न प्रस्ताव तयार गरिसकेको छ ।

साथै आजको बैठकले केहि संवैधानिक निकायमा पनि नियुक्ती गर्नसक्ने सम्भावना छ । हाल अख्तियार दुरुपयोग अनुसन्धान आयोगदेखि दुई दर्जनभन्दा बढि निकायमा प्रमुखहरुको पद रिक्त छ ।