Sansar News
३० भदौ, काठमाडौं। असोज १ गतेबाट आन्तरिक हवाई उडान तथा लामो दुरीका सवारी साधन सञ्चालन हुने भएको छ ।
कोरोना भाइरसको महामारीलाई मध्यनजर गर्दै गत चैत ११ मा लगाइएको लकडाउनपछि बन्द रहेका आन्तरिक उडान र लामो दुरीका सवारीहरु असोज १ गतेबाट सञ्चालन गर्ने निर्णय सरकारले गरेको हो ।
मन्त्रिपरिषद्को सोमबार बसेको बैठकले गरेको निर्णय सार्वजनिक गर्दै परराष्ट्रमन्त्री एवं सरकारका प्रवक्ता प्रदीप ज्ञवालीले सो कुराको जानकारी गराएका हुन् ।
उनका अनुसार लामो दुरीको सवारीमा ५० प्रतिशत भाडा बढी लिन सक्ने व्यवस्था पनि सरकारले गरेको छ । तर हवाई भाडाको दर भने पर्यटन मन्त्रालयले तोकेअनुसार हुने बताइएको छ ।
लामो दुरीको यातायात सञ्चालनका लागि सरकारले स्वास्थ्य मापदण्ड अनिवार्य पालना गर्नु पर्ने निर्णय गरेको छ । सर्तअनुसार सिट क्षमताको आधा मात्र यात्रु बोक्नु पर्ने र मास्क, स्यानिटाइजरलाई अनिवार्य छ ।
फाइल तस्विर
वि.सं.२०७७ भदौ ३० मंगलवार २०:३० मा प्रकाशित
