Sansar News
काठमाडौं । सत्तारुढ नेपाल कम्युनिष्ट पार्टी (नेकपा)को मंगलबार बोलाइएको सचिवालय बैठक आज बस्ने भएको छ । बैठक दिउसो साढे १२ बजेदेखि बस्ने पार्टी प्रवक्ता नारायणकाजी श्रेष्ठले जानकारी दिएका छन् । उनका अनुसार आजको बैठक प्रधानमन्त्री निवास बालुवाटारमा बस्नेछ ।
यसअघि आइतबार पार्टीको सचिवालय बैठक पार्टी कार्यालय पेरिसडाँडामा बसेको थियो । मंगबारको लागि बोलाइएको बैठक पनि पेरिसडाँडामा नै बस्ने तय भए पनि अन्तिम समय स्थगित गरिएको थियो । बैठक स्थगित भएसँगै पार्टी अध्यक्षद्वय केपी शर्मा ओली र पुष्पकमल दाहाल ‘प्रचण्ड’बीच भएको थियो ।
जनाइएअनुसार आजको बैठकबाट मन्त्रिपरिषद पुनर्गठनबारे थप निर्णय हुन सक्नेछ । यसअघि आइतबार बसेको सचिवालय बैठकले मन्त्रिपरिषद पुनर्गठनबारे नीतिगत निर्णय गरेको थियो ।
आइतबारको बैठकले मन्त्रिपरिषद पुनर्गठनको लागि ३ विकल्पमा छलफल गरेको थियो । जसमध्ये कार्यसम्पादनको मुल्यांकनको आधारमा मन्त्रिहरु हेरफेर गर्नेमा दुई अध्यक्ष सहमत देखिएका थिए ।
आजको बैठकले मन्त्रिपरिषदमा लैजाने नेताहरुको विषयमा निर्णय गर्नसक्ने बुझिएको छ । राष्ट्रियसभा सदस्य बनेका बामदेव गौतम र पार्टी प्रवक्ता नारायाणकाजी श्रेष्ठ मन्त्रिपरिषदमा सहभागी हुनबारे चर्चा छ ।
नेकपा स्रोतले जनाएअनुसार आजको बैठकमा यसअघि छलफलमा आएको पार्टी एकताका बाँकी काम र केन्द्रीय समिति सदस्यहरुको व्यवस्थापनलगायतका विषयमा छलफल हुनेछ ।
वि.सं.२०७७ असोज ६ मंगलवार ११:२६ मा प्रकाशित
