Sansar News
काठमाडौं । सत्तारुढ नेकपाका अध्यक्ष एवं प्रधानमन्त्री केपी शर्मा ओलीले पार्टी विभाजन भईसकेको तर घोषणा हुन बाँकी रहेको कुरा अर्का अध्यक्ष पुष्पकमल दाहाल ‘प्रचण्ड’लाई बताएका छन् । बिहिबारको छलफल क्रममा ओलीले यस्तो बताएको कुरा प्रचण्डले आज बसेको सचिवालय बैठकमा राखेका हुन् ।
‘पार्टी अलग–अलग भईसकेको छ तर घोषणा हुन बाँकी छ, तपाईँ सकेको गर्नुस् म सकेको गर्छु’, ओलीको भनाई उद्धत गर्दैै प्रचण्डले बैठकका भनेका छन् ।
ओलीले कुनै बैठक बोलाए त्यसको प्रतिवाद गर्ने बताएसँगै बैठक अनौपचारिक बनाइएको पनि बताइएको छ । प्रचण्डले सचिवालयका सदस्यलाई ओलीले बैठक बोलाएकै समय पार्टी फुटको घोषणा गर्नेसमेत चेतावनी दिएको बताएका थिए ।
शुक्रबारको बैठकले एक पटक सामुहिक छलफल गर्ने नभए विकल्पसहित अगाडि बढ्ने पनि निर्णय गरेको बताइएको छ । एक सञ्चारमाध्यमसँगको कुराकानीमा नेकपा वरिष्ठ नेता झलनाथ खनालले एक पटक आग्रह गर्ने नभए चुप लागेर नबस्ने बताएका छन् ।
गत भदौ २६ मा सम्पन्न स्थायी समिति बैठकले गरेका निर्णयहरु कार्यान्वयनमा समस्या देखिएसँगै नेकपाभित्रको विवाद चरमतातिर पुगेको छ । विवाद चरमतातिर पुग्दै गर्दा पार्टी विभाजन हुने आशंकाहरु गरिएका छन् ।
सम्बन्धित समाचार
प्रचण्डले बोलाएको बैठकको निष्कर्ष : ओलीलाई सामुहिक भेटेर बैठक बोलाउन माग गर्ने
बहुमत सदस्यको उपस्थितिसहित प्रचण्डले सुरु गरे सचिवालय बैठक
प्रचण्डले बोलाएको बैठक बादल नजाने
वि.सं.२०७७ कात्तिक २१ शुक्रवार १८:४४ मा प्रकाशित
