Sansar News
काठमाडौं । नेपाल कम्युनिष्ट पार्टी (नेकपा)भित्रको आन्तरिक विवाद उत्कर्षमा पुग्दै गर्दा प्रधानमन्त्रीसमेत रहेका पार्टी अध्यक्ष केपी शर्मा ओलीले वरिष्ठ नेता माधवकुमार नेपालसहित उनी पक्षीय नेतासँग छलफल गरेका छन् । आइतबार ओलीले नेपाल सहित नेताहरु भीम रावल, सुरेन्द्र पाण्डे, रघुजी पन्तलगायतका नेतासँग छलफल गरेका हुन् ।
बालुवाटारमा झण्डै डेढ घण्टा चलेको छलफलमा प्रधानमन्त्री ओलीले नेपाल पक्षसँग सहकार्यको प्रस्ताव राखेको छलफलमा सहभागी एक नेताले बताए । उनका अनुसार आफुँ अप्ठ्यारोमा परेको भन्दै सहयोग गर्न माधव पक्षसँग आग्रह गरेका थिए ।
जवाफमा नेपाल पक्षले कुनै ठोस प्रस्ताव ल्याउन आग्रह गरेका छन् । छलफलमा नेता नेपालले पार्टी एकता जोगाउने गरि खाका बनाउन ओलीलाई आग्रह गरेका थिए । नेता नेपालले पहिलो अध्यक्ष भएको कारण बढि जिम्मेवार भएर निर्णय लिन आग्रह गरेका थिए ।
भेटमा कुनै निष्कर्ष भने ननिस्किएको बताएको छ ।
यसअघि शनिबार मात्रै पार्टीका कार्यकारी अध्यक्ष पुष्पकमल दाहाल ‘प्रचण्ड’सहित वरिष्ठ नेताहरु झलनाथ खनाल, माधवकुमार नेपाल, उपाध्यक्ष बामदेव गौतम र प्रवक्ता नारायणकाजी श्रेष्ठले सचिवालय बैठकका लागि ओलीलाई लिखित पत्र बुझाएका थिए । उनीहरुले बैठक बोलाउन ४८ घण्टे अल्टिमेटम पनि दिएका थिए ।
अल्टिमेटम दिएको भोलीपल्ट ओलीले नेपाल पक्षसँग छलफल गरेका हुन् ।
सम्बन्धित समाचार
बालुवाटारमा माधव नेपालसहितका नेतासँग प्रधानमन्त्री ओलीको बेग्लै छलफल
वि.सं.२०७७ कात्तिक २३ आइतवार १८:०१ मा प्रकाशित
