हामी सबैकाे संसारन्यूज

७ मंसिर । लोकसेवा आयोग तथा अन्य निकायबाट सञ्चालन हुने परीक्षाको तयारी कक्षामा निजामति कर्मचारीले प्रशिक्षण दिन नपाउने भएका छन् ।

संघीय मामिला तथा सामान्य प्रशासन मन्त्रालयले प्रेस विज्ञप्ति जारी राजपत्राङ्कित प्रथम श्रेणी वा सो भन्दा माथिल्लो पदमा कार्यरत निजामती कर्मचारीले स्वीकृति नलिई निजी इन्स्टिच्यूटमा उपस्थित भई वा अनलाइन माध्यमको उपयोग गरी लिखित वा मौखिक प्रशिक्षण दिन नपाउने मन्त्रीस्तरीय निर्णय जानकारी गराएको हो ।

सबै निजामती कर्मचारीलाई सेवा प्रवाहमा तल्लिन बनाइ निजामती सेवालाई व्यवस्थित र मर्यादित बनाउने उद्देश्यले मन्त्रीस्तरबाट यस्तो निर्णय भएको जनाउँदै यसअघि कुनै मन्त्रालयबाट वा निकायबाट कुनै कर्मचारीलाई स्वीकृति उपलब्ध गराइएको भए पनि आजको मितिबाट निष्कृय हुने स्पष्ट पारिएको छ ।

स्वीकृति प्राप्त नगरी यस्ता प्रकृतिका प्रशिक्षण कार्यमा प्रशिक्षकको रुपमा कार्य गरेको वा कार्यालय समयमा निजी इन्स्टिच्युटको प्रशिक्षण कार्यमा सहभागी हुने काम निजामती सेवा ऐन र नियमको विपरित हुने हुँदा त्यस्ता कर्मचारीलाई सम्बन्धीत निकायबाट कारवाही प्रक्रिया अगाडि बढाउने विज्ञप्तिमा उल्लेख छ ।