हामी सबैकाे संसारन्यूज

९ मंसिर,काठमाडौं । बर्दिबासमा गुलाप्सा खातुनको हत्या गरेको अभियोगमा एक युवा पक्राउ परेका छन् । बर्दिबास नगरपालिका-१४ सुगम बस्ती बस्ने सादिम अलामकी ६ वर्षीया छोरी गुलाप्सा खातुनको गौशाला नगरपालिका-५ जिरो माईल घर भएका २६ वर्षीय अरुण कुमार साहले हत्या गरेको अभियोग छ ।

आफ्नै घर अगाडि खेलिरहेको अवस्थामा आइतबार साँझ बालिका हराएपछि ईलाका प्रहरी कार्यालय बर्दिबासले खोजी तथा अनुसन्धान सुरु गरेको थियो । अनुसन्धानमा सम्लग्न प्रहरीका अनुसार साहले उनको पसलमा सामान किन्न आएकी बालिकालाई पसलको पछाडिको कोठामा लगि तौलियाले घाँटी थिच्दा उनको मृत्यु भएको थियो । मृत्यु पछि शव आफू सुत्ने कोठामा लगि राखेको र सोमबार साँझ शव बोरामा हाली घर भन्दा अन्दाजी ४० मिटर टाढा बारीमा फालेको खुल्न आएको छ ।

घटना पश्चात अरूणले गौशाला नगरपालिका-५ स्थित घरमा गई घर परिवारलाई घटनाबारे जानकारी गराए पश्चात मृतकको बुबाले ईलाका प्रहरी कार्यालय गौशालामा पुर्‍याएपछि उनलाई प्रहरीले पक्राउ गरेको हो । घटनाको विषयलाई लिएर मृतकका आफन्त र स्थानीयले साहको पसल भएको घर आगजनी गर्नुका साथै बर्दिबास नगरपालिका-१४ स्थित चोकमा सडक अवरोध गरेका छन् ।