हामी सबैकाे संसारन्यूज

पुस १०, काठमाडौं । नवनियुक्त संस्कृति, पर्यटन तथा नागरिक उड्डयन मन्त्री भानुभक्त ढकालले आफ्नो उद्देश्य अतिरिक्त सुविधा र पैसा कमाउने नरहेको बताएका छन् । आइतबार मन्त्रालयमा कार्यभार सम्हाल्दै उनले यस्तो बताएका हुन् ।

‘स्वभाविमान र इमानलाई बन्धक राखेर अतिरिक्त सुविधा र पैसा आर्जन गर्नु मेरो राजनीतिको उद्देश्य छैन, जति सक्छु म सेवामा समर्पित हुन्छु, जति कमाउनु छ सुनाम कमाउनु मात्रै छ’, उनले भने ।

मन्त्री ढकालले पर्यटन मन्त्रालयमा आउने मन्त्रीहरु प्रायः बदनाम हुँदै आएको पनि बताए । पर्यटन मन्त्रालयलाई बदनामरहित बनाउन आफुँले सक्दो भूमिका खेल्ने उनको भनाई छ ।

तर, मन्त्री स्वंय यसअघि स्वास्थ्य मन्त्रालयमा रहँदा निकै बदनामीत भएका व्यक्ति हुन् । उनीमाथि लागेका गम्भीर आरोपहरु अहिले पनि छानबिनकै क्रममा छन् । स्वास्थ्य सामाग्री खरिद प्रकरणमा भएको अर्बौं खेलोमा उनको बदनीयतपूर्णं संलग्नता रहेको धेरैले आरोप लगाउने गर्दछन् ।