हामी सबैकाे संसारन्यूज

पुस २७, काठमाडौं । विभाजित नेकपाका अध्यक्षद्वय पुष्पकमल दाहाल प्रचण्ड र माधवकुमार नेपाल स्वंय नै निर्वाचन आयोग पुगेर निर्वाचन प्रक्रिया रोक्न माग गरेका छन् । सोमबार अध्यक्षद्वयसहित प्रचण्ड–नेपाल पक्षका केहि नेता निर्वाचन आयोग पुगेका थिए ।

प्रचण्ड–नेपाल पक्षले निर्वाचन आयोगमा निर्वाचन प्रक्रिया रोक्न पत्र नै बुझाएको छ । प्रतिनिधि सभा विघटनसम्बन्धी मुद्दा सर्वोच्चमा विचाराधिन रहेकै अवस्थामा निर्वाचन प्रक्रिया अगाडि बढाइएको भन्दै नेकपाले आपत्तिसहित पत्र बुझाएको हो ।

“उपरोक्त सम्बन्धमा प्रधानमन्त्री केपी शर्मा ओलीले नेपालको संविधानले परिकल्पना नगरेको अवस्थामा प्रतिनिधिसभा गैरसंवैधानिक ढंगबाट विघटनको सिफारिस गरी राष्ट्रपतिबाट २०७७ पुस ५ गते प्रतिनिधिसभा विघटनको घोषणा भएको उक्त सिफारिस र विघटनको घोषणालाई बदर गरी पाउन सर्वोच्च अदालतमा हाम्रो पार्टीको तर्फबाट प्रतिनिधिसभामा प्रतिनिधित्व गर्नुहुने प्रतिनिधिसभा सदस्य, प्रतिनिधिसभामा पार्टीका प्रमुख सचेतकका रूपमा रहनुभएका पार्टी स्थायी कमिटी सदस्य देव गुरुङसमेतले सम्माननीय प्रधानमन्त्रीसमेतका विरुद्धमा उत्प्रेषण परमादेशसमेतको आदेश जारी गरी पाऊँ भन्ने निवेदन पत्र दर्ता गर्नुभई हाल उक्त मुद्दा सम्मानित सवोच्च अदालतमा विचाराधीन अवस्थामा छ,” प्रचण्ड नेपाल समूहले आयोगलाई बुझाएको पत्रमा भनिएको छ ।

यस्तो छ प्रचण्ड–नेपाल समुहले आयोगमा बुझाएको पत्र