Sansar News
२८ पुस, काठमाडौं । तीन पार्टीका बुद्धिजीवी संगठनले प्रधानमन्त्री केपी शर्मा ओलीले प्रतिनिधिसभा विघटन गरेर प्रतिगिमनकारी कदम चालेको भन्दै विरोध गरेका छन् ।
नेकपा निकट नेपाल बुद्धिजीवी संगठन, नेपाली कांग्रेस निकट प्रजातान्त्रिक विचार समाज र जनता समाजवादी पार्टी निकट नेपाल बौद्धिक पेशाकर्मी महासंघले सरकारको अलोकतान्त्रिक, असंबैधानिक र सर्वसत्तावादी कदम सच्याउदै देशलाई संविधानवादको लोकतान्त्रिक दिशामा फर्काउन सरकार तथा सम्बन्धीत सबैमा आग्रह गरेका छन् ।
नेकपा निकट नेपाल बुद्धिजीवी संगठनका संयोजक डा.दिनेशचन्द्र देवकोटा, नेपाली कांग्रेस निकट प्रजातान्त्रिक विचार समाजका अध्यक्ष डा.केदार नरसिंह केसी र जनता समाजवादी पार्टी निकट नेपाल बौद्धिक पेशाकर्मी महासंघका संयोजक कृष्ण शर्माद्धारा मंगलबार जारी विज्ञप्तिमा भनिएको छ,‘सरकारको अलोकतान्त्रिक र असंबैधानिक कदमका विरुद्ध आ-आफ्नो ठाउँबाट खबरदारी र सहकार्य गर्न संघीय लोकतान्त्रिक गणतन्त्र पक्षधर सम्पूर्ण बुद्धिजीवीमा हार्दिक अपिल गर्दछौं ।’
वि.सं.२०७७ पुस २८ मंगलवार १६:२५ मा प्रकाशित
