Sansar News
१ माघ, काठमाडौँ । नेपाल कम्युनिष्ट पार्टी (नेकपा) को पुष्पकमल दाहाल प्रचण्ड र माधवकुमार नेपाल समूहको स्थायी कमिटी बैठक आन्दोलनका कार्यक्रमलाई अझै कसरी प्रभावकारी बनाउने निर्णयका साथ सकिएको छ ।
पेरिसडाँडामा बिहीबार बसेको बैठक स्थायी कमिटी बैठक पुनः शुक्रबार बस्ने गरी सकिएको हाे ।
बैठकले संसद विघटन गर्ने प्रतिगामी कदमविरुद्धको आन्दोलन प्रभावकारी हुँदै गएको निश्कर्ष निकाल्दै आन्दोलनलाई अझ प्रभावकारी बनाउन थप रणनीति तय गर्ने जनाएको छ ।
नेता रघुजी पन्तका अनुसार अहिलेसम्मको आन्दोलन प्रभावकारी भएको भन्दै अझै प्रभावशाली बनाउन पहल गर्ने निर्णय भएको छ ।
प्रतिनिधिसभा विघटनविरुद्ध यो समूहले पुस १८ मा दोस्रो चरणको आन्दोलनका कार्यक्रम घोषणा गरेको थियो । पौष २२ गते देखि माघ २३ गतेसम्म आन्दोलनका कार्यक्रम घोषणा गरेको प्रचण्ड माधव समूहले माघ २३ गते राजधानीमा बृहद् विरोध प्रदर्शन र सभा गर्ने कार्यक्रम सार्वजनिक गरेको छ ।
बैठकमा रिपोर्टिङ गर्ने नेताहरुले आन्दोलनका कार्यक्रमलाई अझै प्रभावकारी बनाउनु पर्ने सुझाव राखेको भुसालले बताए । तर, कार्यक्रमको स्वरुप कस्तो हुने भन्ने निर्णय भइनसकेको उनले बताए ।
बैठकमा अध्यक्ष नेपाल नेतृत्वको कार्यदलले प्रतिवेदन समेत पेस गरेको स्थायी कमिटी सदस्य बेदुराम भुसालले जानकारी दिए । उक्त प्रतिवेदन र आन्दोलनका कार्यक्रमबारे शुक्रबार बस्ने बैठकमा थप छलफल हुने बताइएको छ।
वि.सं.२०७७ माघ १ बिहीवार २०:२४ मा प्रकाशित
