Sansar News
माघ २, काठमाडौं । अमेरिकी राष्ट्रपति डोनाल्ड ट्रम्पको कार्यकाल मात्रै पाँच दिन बाँकी छ । तर, उनले अन्तिम समयमा निकै महत्वपूर्णं निर्णयहरु गर्न सुरु गरेका छन् ।
ट्रम्पले बिहिबार राती चिनियाँ ९ कम्पनीमाथि प्रतिबन्धको घोषणा गरेका छन् । अन्तराष्ट्रिय सञ्चारमाध्यमले जनाएअनुसार चिनियाँ मोबाइल तथा इलेक्ट्रोनिक्स कम्पनी श्याओमीलगायत ९ कम्पनीमाथि प्रतिबन्ध लगाएका हुन् ।
यसअघि ट्रम्पले ३९ चिनियाँ कम्पनीमाथि प्रतिबन्ध लगाएका थिए । चिनियाँ कम्पनीबाट अमेरिकामा सुरक्षा खतरा रहेको बताउँदै उनले प्रतिबन्धको निर्णय गरेका हुन् ।
ट्रम्पको घोषणाबाट चीन समस्यामा
ट्रम्पले चिनियाँ कम्पनीमाथि प्रतिबन्ध मात्रै नलगाईन अमेरिकी लगानीकर्तालाई लगानी गर्न पनि रोक लगाईदिएका छन् । जनाइएअनुसार उनको निर्णयसँगै अब अन्य चिनियाँ कम्पनीलाई अमेरिकामा व्यापार व्यवसाय गर्न समस्या सिर्जना भएको छ । अमेरिकी व्यवसायीको सहयोग बिना प्रतिबन्ध नलगाइएका कम्पनीलाई पनि ट्रम्पको निर्णयसँगै कारोबार गर्न मुश्किल परेको छ ।
ट्रम्पको यो निर्णयसँगै चीन थप समस्यामा परेको स्पष्ट हुन्छ ।
ट्रम्पको निर्णयप्रति बाइडेन मौन
पाँच दिन कार्यकाल बाँकी रहेका बेला ट्रम्पले गरेको यस्तो निर्णयप्रति नयाँ राष्ट्रपति जो बाइडेन भने मौन देखिएका छन् । उनले ट्रम्पको कदमप्रति कुनै प्रतिक्रिया जनाएका छैनन् ।
हुनत बाइडेन स्वंय पनि चीन प्रति व्यवहार परिवर्तन गर्नुपर्ने बताएका थिए । उनले अमेरिकालाई आत्मनिर्भरताको बाटोमा अगाडि बढाउनुपर्ने चुनावी नारा दिएका थिए ।
वि.सं.२०७७ माघ २ शुक्रवार १४:४४ मा प्रकाशित
