Sansar News
माघ १४, काठमाडौं । विभाजित नेपाल कम्युनिष्ट पार्टी (नेकपा)का उपाध्यक्ष वामदेव गौतमले बुधबारदेखि औपचारिक रुपमा एकता अभियान सुरु गरेका छन् । उनले ‘नेपाल कम्युनिष्ट पार्टी (नेकपा) पार्टी एकता राष्ट्रिय अभियान’ नाम दिएर अभियानको सुरु गरेका छन् । जुन अभियानको घोषणा धोबिघास्थित सिद्धार्थ पार्टी प्यालेसमा विशेष कार्यक्रम आयोजना गरि गरिएको छ ।
अभियानको घोषणा गर्दै उनले प्रधानमन्त्री केपी शर्मा ओली र पुष्पकमल दाहाल प्रचण्डलाई आफुँले मात्रै मिलाउन सक्ने दाबी गरे । उनले विभाजनबाट कसैको भलो नहुने भन्दै एकताको अभियानमा लाग्न सबैलाई आग्रह गरेका छन् ।
को–को सहभागी छन् एकता अभियानमा ?
पार्टी विभाजनसँगै बामदेव नजिक देखिएका अधिकांश केन्द्रीय सदस्य प्रचण्ड–नेपाल पक्षमा लागेका छन् । केहि सदस्य ओली पक्षमा पनि लागेका छन् । एकता अभियान चलाउँदै गर्दा भने उनीसँग सीमित नेताहरु देखिएका छन् ।
बुधबारको घोषणा सभामा गौतमसँगै पूर्वमन्त्री हरि पराजुली, निर्वतमान सांसद माया ज्ञवाली र तुलसा थापा, पूर्व सांसद डीबी कार्कीलगायतका उपस्थित थिए । उनीसँगै बागमती प्रदेशका सांसद विनोद खड्का, किर्तीपुर नगरपालिकाका मेयर रमेश महर्जन, त्रिवीका पूर्वउपकुलपति हिराबहादुर महर्जनलगायत सहभागी भएका थिए ।
गौतमको एकता अभियानमा सुरुदेखि नै देखिएका अर्का प्रदेश सांसद दिपक मनाङ्गे भने सहभागी भएका थिएनन् ।
सम्बन्धित समाचार
प्रचण्ड र ओली दुवैजना पार्टी चिरा-चिरा पार्न लाग्नु भएको छ-उपाध्यक्ष वामदेव गौतम
वि.सं.२०७७ माघ १४ बुधवार १५:४६ मा प्रकाशित
