हामी सबैकाे संसारन्यूज

४ फागुन, काठमाडौँ । प्रतिनिधिसभा विघटन गर्नुको जुन कारण देखाइएको छ त्यो बदनियत र असंवैधानिक भएको एमीकस क्युरीका एक सदस्यले बताएका छन् ।

संवैधानिक इजलासलाई प्रतिनिधिसभा विघटनविरुद्धको मुद्दामा राय दिने क्रममा वरिष्ठ अधिवक्ता बद्रीबहादुर कार्कीले प्रतिनिधिसभा विघटनको कारण हेर्दा बदनियत र असंवैधानिक भएको देखिएको बताएका हुन् ।

सर्वोच्चको संवैधानिक इजलासमा बहस सुरु गर्दै कार्कीले प्रधानमन्त्रीको नियत नै खराब भएको बताए । उनले पार्टीभित्रको झगडालाई मुख्य कारण मानेर संसद् विघटन गर्नु असंवैधानिक भएको र त्यो आधारमा प्रधानमन्त्रीलाई विघटनको अधिकार नभएको बताएका छन ।

संसद् विघटन हुने संवैधानिक आधार र प्रक्रिया पूरा नभएसम्मका लागि विघटन गर्न नपाइने उनको भनाइ थियो । जनताबाट चुनिएका प्रतिनिधिबाट संसद बनेको र त्यही संसदले प्रधानमन्त्री बनाएको भन्दै प्रधानमन्त्री संसदप्रति जबाफदेही बन्नुपर्ने पनि उनको भनाई थियो ।

एमीकस क्युरीको आजदेखि सुरु भएको बहसमा वरिष्ठ अधिवक्ता कार्कीले राय दिएका हुन् । बुधबारदेखि बाँकी ४ जनाले क्रमशः राय दिनेछन् ।

यो मुद्दामा सर्वोच्च नेपाल बार एशोसिएशनबाट ३ जना र सर्वोच्च अदालत बार एशोसिएसनबाट २ जना एमिकस क्युरीमा सिफारिस भएका छन् । जसअनुसार नेपाल बारबाट बद्रीबहादुर कार्की, विजयकान्त मैनाली र सतीशकृष्ण खरेल तथा सर्वोच्च अदालत बार एशोसिएसनबाट पूर्णमान शाक्य र गीता पाठक एमिकस क्युरीको रुपमा चयन भएका छन् ।

एमिकस क्युरीको बहस आजदेखी