हामी सबैकाे संसारन्यूज

६ फागुन, चितवन । तपाई गुरुपूर्णिमामा आफूलाई पढाएका गुरुलाई के उपहार दिनुहुन्छ धेरैजसोको जवाफ हुन्छ केही थुँगा फूल, मिठाइ अनि गुरुको खुट्टा वा हात ढोगेर गुरुको आर्शिवाद । धेरै विद्यार्थीले गुरु पूर्णिमाका दिन यहि गर्छन् ।

तर, चितवनका एक विद्यालमा पढेका पूर्व विद्यार्थीहरुले भने आफ्ना गुरुका लागि २३ लाख खर्चिएर बस्ने सुन्दर घर बनाइदिएका छन् ।

उनीहरुले २०७६ सालको गुरुपूर्णिमामा जगर खन्न सुरु गरेर २०७७ सालमा गुरुका लागि चारकोठे घर र घरभित्र विभिन्न सामग्रीहरुका लागि २३ लाख जोगाड गरेर घर बनाइदिएका हुन् ।

यस्तो उदाहरणीय काम गरेका हुन् चितवनको खरहनीस्थित कंकाली माविका विद्यार्थीले । त्यहि विद्यालयबाट शिक्षा लिएका पूर्वविद्यार्थीहरुले आफूलाई पढाएका गुरु पशुपतिलाल कर्णका लागि घर निर्माण गरेर सरस्वती पूजाको दिन बिभिन्न कार्यक्रमको आयोजना गरेर घर उपहार दिएका हुन् ।

यसको नेतृत्व गरेका हुन् पूर्वविद्यार्थी कारी महतोले । महतोले कंकाली माविमै कखरा चिनेर अहिले आफै शिक्षक भएर सोहि स्कुलमा पढाएका छन् । कर्णले सबैलाई पढ्नका लागि प्रेरणा दिएको पनि उनी बताउँछन् ।

२०२४ सालमा खुलेको उक्त कंकाली स्कुलमा कर्णले २०२७ सालदेखि २०६९ सम्म पढाएका थिए ।

पूर्बी मधेश सिराहाको धनगढी माई नगरपालिका नैनरपुरबाट चितवन आएका कर्णले आफ्नो सारा जीवन शिक्षक पेशामा विताए । सक्दासम्म पढाउँछु भन्ने उनको रहर भएपनि उमेर हदले अहिले उनले अवकास पाएका छन् । साथै कर्णको अर्को इच्छा पनि थियो कि आफूले पढाएको स्कुल हेदै जीवनका अन्तिम क्षणहरु विताउने ।

कर्णले जागिरकै दौरान स्कुल अगाडि सात धुर जमिन पनि किनेका थिए । तर, श्रीमतीलाई क्यान्सर भएको र उनको उपचारमा लाग्नु परेका कारण उनले घर बनाउन भने सकेका थिएनन् । आफ्नो दुःख देखेरै हुर्केका र पढेका विद्यार्थीहरुले आफ्नो मनोभावना बुझेर गुरु दक्षिणका रुपमा घर अर्पण गरेकोमा उनले खुसी व्यक्त गरे ।