हामी सबैकाे संसारन्यूज

फागुन ११, काठमाडौं । प्रधानमन्त्री केपी शर्मा ओलीले संसद पुनर्स्थापना हुँदैनमा केहि फरक नपर्ने बताएका छन् । मंगलबार आफुँ पक्षीय राष्ट्रिय यूवा संघको केन्द्रीय समिति बैठकलाई सम्बोधन गर्दै उनले संसद पुनर्स्थापना हुँदैमा प्रचण्ड प्रधानमन्त्री बन्न नपाउने बताए ।

‘पुनर्स्थापना भए के हुन्छ ?’, ओलीको प्रश्न छ, ‘प्रचण्ड जी र माधव नेपाल जी हल बाँधेर प्रधानमन्त्री खोज्न हिँड्नुहुन्छ, उहाँहरुको कुनै चान्स छ प्रधानमन्त्री हुने ? एक प्रतिशत पनि छैन् ।’

ओलीले अन्तिममा आफुँ नै पुनः प्रधानमन्त्री हुने पनि दाबी गरे । ‘जितेमा पनि प्रधानमन्त्री खोज्दै हिँड्ने अवस्था हुन्छ, उत्तर दक्षिण धाउँदा धाउँदै लास्टमा उहाँहरु मकहाँ आउनुपर्छ’, उनले भने ।

अदालतले वर्तमान राजनीतिक स्थिति बुझेको भन्दै पुनर्स्थापनाको निर्णयमा नजाने उनको भनाई छ । ‘अदालतलाई राम्रोसँग थाहा छ’, ओलीले भने, ‘त्यस्तो अस्थिरतातर्फ अदालतले जान देला भन्ने मलाई विश्वास छैन् ।’

बहमुतको प्रधानमन्त्रीले सरकार चलाउन सहज नभएको अवस्थामा संसद विघटन गर्ने परिपाटी भएको भन्दै विघटन सामान्य प्रक्रिया भएको ओलीको जिकिर छ ।

मंगलबार एक सार्वजनिक कार्यक्रममा बोल्दै विभाजित नेकपाका अध्यक्ष पुष्पकमल दाहाल ‘प्रचण्ड’ले अदालतले संसद पुनस्र्थापनाको पक्षमा फैसला गर्ने बताएका थिए । ओलीले लडाईँ हारिसकेको उनको भनाई थियो ।

याे पनि…

अदालतले हाम्रै पक्षमा फैसला गर्नेछ : प्रचण्ड

एक अर्को प्रसङ्गमा बोल्दै उनले प्रचण्ड–नेपाल समूह झिंगा र आफ्नो पक्ष कर्मी मौरी भएको बताए । पुर्नगठित यूवा संघको केन्द्रीय समितिलाई धन्यवाद दिँदै ओलीले युवाहरुले फोहोर छुट्याउन सक्ने बताए ।

‘हामी कर्मी मौरीजस्ता हौं, हामी बगैंचाबाट घार बनाउँछौं, झिँगाको पछाडि गए फोहोरको डंगुरमा पुगीन्छ, आफुँ पनि रोगी भईन्छ अरु पनि रोगी हुन्छन्’, उनले भने, ‘तपाईँहरु विवेकी हुनुहुन्छ, तपाईँहरुले फरक छुट्याउनु भयो ।’