हामी सबैकाे संसारन्यूज

२९ फागुन, काठमाडौं । नेकपा एमालेका वरिष्ठ नेता झलनाथ खनाल र माधव नेपाल पक्षीय केन्द्रीय कमिटीको बैठकले समानान्तर कमिटी विस्तार गरेको छ । शनिबार नयाँ बानेश्वरस्थित अर्याल होटलमा बसेको केन्द्रीय सदस्यहरुको बैठकले कमिटी विस्तार गरेको हो ।

शुक्रबार पार्टी अध्यक्ष केपी शर्मा ओलीले एकलौटी निर्णयमार्फत नेपाल–खनाल निकट नेताहरुको जिम्मेवारी खोसेपछि उनीहरुले पनि समानान्तर कमिटी विस्तार गरेका हुन् ।

नेपाल–खनालद्वारा विस्तारित कमिटी अनुसार प्रदेश १ को संयोजनमा भीम आचार्य, प्रदेश २ को संयोजनमा घनश्याम भुसाल, वागमती प्रदेशको संयोजनमा अष्टलक्ष्मी शाक्य, गण्डकीको संयोजनमा सुरेन्द्र पाण्डे, लुम्बिनी र कर्णालीको संयोजनमा युवराज ज्ञवाली र सुदूरपश्चिममा भीम रावल रहेका छन् ।

युवा विभागको प्रमुखमा रघुजी पन्त, विद्यार्थी विभागमा गोकर्ण विष्ट, प्रचार विभागको जिम्मा योगेश भट्टराई, महिला विभागको जिम्मा अष्टलक्ष्मी शाक्यलाई र बुद्धिजीवी विभागको जिम्मा प्रमेश हमाललाई दिइएको छ।