हामी सबैकाे संसारन्यूज

२१ चैत्र, काठमाडौं । नेकपा एमालेको माधव नेपाल समूहले पार्टी पुनर्गठनको दुई महिने कार्यक्रम घोषणा गरेको छ ।

काठमाडौँमा शनिबार बसेको नेपाल पक्षधर स्थायी कमिटी बैठकले पार्टी संगठन निर्माण र सुदृढीकरणका लागि दुई महिने कार्यक्रम घोषणा गरेको हो । बैठकले ‘एमालेको एकता जोगाऔँ, कम्युनिस्ट आन्दोलनको रक्षा गरौँ’ नारासहित चैत १५ देखि असार १५ सम्म दुई महिना अभियान कार्यक्रम सार्वजनिक गरेको छ ।

बैठकले अभियानका साथै प्रशिक्षणका दुई महिने कार्यक्रम गर्ने निर्णय गरेको स्थायी कमिटी सदस्य योगेश भट्टराईले जानकारी दिए । चैत ४ र ५ गते सम्पन्न राष्ट्रिय कार्यकर्ता भेलामा प्रस्तुत गरिएको प्रतिवेदनमा स्थायी कमिटी र केन्द्रीय कमिटी सदस्यहरूका सुझाव थपेर प्रकाशन गरिने र प्रशिक्षणका लागि मुलुकभर लगिने नेता भट्टराईले जानकारी गराएका छन् ।

भट्टराईका अनुसार दुई महिने अभियानका क्रममा २०७५ जेठ २ गतेसम्मको पार्टी कमिटी पुनर्सञ्चालन, गठन र पुनर्गठन गर्ने निर्णय भएको छ ।

चैत ४ र ५ गते राष्ट्रिय कार्यकर्ता भेलामा प्राप्त भएका सुझावलाई समेटेर सुदृढीकरणको अवधारणापत्र तयार पारेको नेपाल समूहका नेताहरुले बताएका छन् । पार्टीका अन्तरविरोधलाई लिएर कार्यकर्तालाई प्रशिक्षित गर्ने निर्णय पनि बैठकले गरेको जनाइएको छ । दुई महिने अभियानका क्रममा वडा तहसम्म पुग्ने बताइएकाे छ ।

बैठकले दुई पार्टीलाई पूर्ववत अवस्थामा फर्काउने २३ फागुनको सर्वोच्च अदालतको फैसलाअनुसार २ जेठलाई आधार मानेर पार्टी एकतामा फर्कन अध्यक्षलाई आग्रह गरेको छ ।

पार्टी एकता जोगाउनका निम्ती यो दुई महिनाको अवधिमा तीनवटा ठूला सभा गर्ने निर्णय पनि बैठकले लिएको छ ।जसअनुसार बैशाख ९ गते राजधानीमा सभा गर्ने, १३ गते विराटनगरमा र जेठ ३ गते चितवनमा सभा गर्ने नेपाल समूहको तयारी छ । ९ गते एमाले स्थापना दिवसको अवसर, १३ गते विराटनगरमा मनमोहन स्मृति दिवस र ३ जेठ मदन–आश्रित स्मृति दिवसका अवसरमा चितवनमा राष्ट्रियस्तरको कार्यक्रम आयोजना गर्ने निर्णय यो समूहले लिएको छ ।