Sansar News
५ वैशाख, काठमाडौं । प्रदेशमा सरकार हेरफेरको कसरत चलिरहदा ससंकित रहेका सुदूरपश्चिम प्रदेशका मुख्यमन्त्री त्रिलोचन भट्ट अहिले भने निर्धक्क छन् । उनी कर्णालीको संसदीय राजनीतिमा आएको तरंगका कारण पनि हाल निर्धक्क छन् ।
सुदूरपश्चिम प्रदेशमा माओवादी केन्द्रको सरकार रहेपनि उ सँगमात्र १४ सांसद रहेको छ । कुल ५३ सदस्य रहेको प्रदेशसभामा सरकार बन्नको लागि २७ सांसदको आवस्यक्ता पर्छ । तर, उनी हाल ढुक्क हुनुमा यो प्रदेशमा एमाले भित्र माधव नेपाल पक्षमा बहुमत सांसद रहनु हाे । यो प्रदेशमा नेपाल पक्षमा १८ सांसद रहेका छन् ।
एमाले ओली पक्षले कुनै पनि हालतमा मुख्यमन्त्री भट्टको बहिर्गमन चाहेको भएपनि नेपाल पक्ष भट्ट नेतृत्वको सरकार जोगाउने पक्षमा छ । नेपाल पक्षको समर्थनले उनको सरकारलाई बहुमत पुग्ने हुदा उनी हाल ढुक्क छन् । हाल एमालेभित्र प्रधानमन्त्री केपी शर्मा ओली र नेता माधवकुमार नेपाल पक्षबीच उत्पन्न दरारको फाइदा माओवादी केन्द्रका प्रदेश सरकारले उठाइरहेका छन् ।
हालसम्म पनि एमालेका नेपालपक्षीय १८ सांसदको साथ रहेकोले प्रदेश सरकारमा कुनैपनि समश्या नरहेको सुदूरपश्चिम माओवादी केन्द्रका सचेतक अक्कलबहादुर रावल बताउछन् । ‘सरकार ढल्छ कि भनेर हामीले चिन्ता गर्नुपर्ने कुनै कारण छैन ।’ रावलले भने, ‘एमालेको नेपालपक्षीय १८ सांसदको पूरै समर्थन छ ।’
वि.सं.२०७८ वैशाख ५ आइतवार १२:०२ मा प्रकाशित
