Sansar News
२० बैशाख, काठमाडौं । आज राति १२ बजेदेखि आन्तरिक तथा अन्तराष्ट्रिय उडानका सबै सेवा बन्द गरिने भएको छ ।
नेपालमा केही सातायता कोरोना संक्रमण भयावह रुपमा बढ्दै गएको निष्कर्षसहित बैशाख मसान्तसम्म आन्तरिक तथा केही अन्तराष्ट्रिय उडानमा रोक लगाउने आइतबारको मन्त्रिपरिषद्को बैठकले निर्णय गरेको हो ।
कोभिड–१९ संकट व्यवस्थापन केन्द्र (सीसीएमसी)को सिफारिस अनुसार आइतबारको मन्त्रिपरिषद्को बैठकले उक्त निर्णय गरेको हो ।
उक्त बैठकले भारत, ब्राजिल र दक्षिण अफ्रिकाबाट हुने उडान पूर्ण रुपमा बन्द गर्ने र अन्य अन्तराष्ट्रिय उडानमा मापदण्ड पूरा गरेर उडान गर्न सकिने बताइएको छ ।
यसैबीच त्रिभुवन अन्तराष्ट्रिय विमानस्थलका महाप्रबन्धक प्रताववावु तिवारीले अन्तराष्ट्रिय उडानमा रोक लगाउने भन्ने बारेमा पूर्ण निर्णय बाहिर नआइसकेको बताए । ‘आन्तरिक उडान आज राति १२ बजेदेखि बन्द हुनेछ । अन्तराष्ट्रिय उडान बन्द हुने भनेर निर्णय बाहिर आइसकेको छैन । आज दिनभरीमा त्यसको बारेमा पनि पूर्ण निर्णय आइसक्ला !’ महाप्रबन्धक तिवारीले संसारन्युजसँग भने ।
वि.सं.२०७८ वैशाख २० सोमवार ०८:३८ मा प्रकाशित
