हामी सबैकाे संसारन्यूज

दाजुभाइ
क्रोधित हुँदा उर्लदो भेल हुन्
भातृप्रेममा गतिशील सागर हुन
दाजु
प्रचन्ड तातोमा आफु डढेर
कलिलो रङ जोगाउने छाता हो
पहाडमा खोपिएको ओडार जस्तो
भरपर्दो छत हो
भुईँमा लत्रिएका लहरालाई
स्वाभिमानपुर्वक उठाउने टेवा हो
जसको काखमा हुर्किन्जेल
बादलले छोप्न सक्दैन अनुज अनुहारको कान्ति
फितलो हुन्छ चुनौतिको हुरी बतास
कमजोर बन्छन् गडगडाउने खहरेहरू
ओरालोमा फराल्दै बिलाउछ मुसलधारे वर्षा
हुर्कन्छ अवोध बालापन

आमा बुबा जस्तै हात समातेर डोर्याउने
पितातुल्य अग्रज हो दाजु
पाइला पाइलामा हिडाएर
पाइला पाइलामा डोर्याएर
अनुशासन, ज्ञान र कर्तव्यको चक्षु खोलिदिने
सत्मार्ग हो दाजु
भुल्दै भुल्दैन
भुल्नै सक्दैन भाइको बालापन

भाइ
दाजुका पाइला पाइलामा
दुःख सुखको
आपत विपतको भरोसाको लट्ठी हो
जो
सितिमिति कमजोर भएर भाँचिदैन
हर समयका कठिनाईमा
ढाल भएर उभिन्छ
उकालोमा होस वा ओरोलोमा होस
मैदानमा होस वा गल्छिमा होस
निहुरिएर काँध थाप्छ
छोरो समान भएर उभिन्छ
र त
समग्रमा दाजुभाइ
एउटा हत्केलामा फरक पहिचान बोकेका
पाँच औला हुन्
एउटा अनुहारका दुई आँखा हुन्
एउटै गतिका दुई पाइला हुन्
एउटै शरिरका दुई पाइला हुन
सम्बन्धको तुलोमा
मायाको कसिमा
पलपल एक विना अर्काको सम्बन्ध
सधै
अपुरो र अधुरो हुन्छ ।