२८ माघ, काठमाडौँ। राष्ट्रिय समाचार समिति (रासस) कर्मचारी सङ्घको आयोजनामा आज राससको केन्द्रीय कार्यालय परिसर र त्यसका वरपर सरसफाइ गरिएको छ । राससको आसन्न ५६औँ वार्षिकोत्सवको अवसरमा सो सरसफाइ कार्यक्रमको आयोजना गरिएको हो ।कार्यक्रमको शुभारम्भ गर्दै राससका अध्यक्ष कुलचन्द्र वाग्लेले समय समयमा हुने यस्ता रचनात्मक कार्यले कर्मचारीबीच आपसी भावनात्मक एकता कायम राख्ने र मनलाई पनि स्वःफूर्त बनाउने बताउनुभयो । सङ्घका अध्यक्ष मनोज लामिछाने मानिस स्वस्थ रहन सरसफाइमा धेरै ध्यान दिनुपर्ने भएकाले त्यसको सुरुवात् आफ्नो घर र आफ्नो कार्यालयबाटै सुरुवात गर्नुपर्छ भन्ने उद्देश्यकासाथ यो कार्यक्रम सञ्चालन गरिएको बताउनुभयो । सरसफाइ कार्यक्रममा राससका नायब महाप्रबन्धक सुरेन्द्र नेपाली, प्रधानसम्पादक राजु शाक्य, विभागीय प्रमुखहरु, सम्पादकहरु, प्रमुख समाचारदाता, राससका पूर्व कर्मचारी शीतल कोइरालालगायतको सहभागिता थियो । सङ्घले राससका कर्मचारीका लागि भोलि शनिबार मुटु तथा मिर्गौलाको परीक्षणसम्बन्धी निःशुल्क स्वास्थ्य शिविरको आयोजना गर्दैछ । राससले आउँदो फागुन ७ गते आफ्नो ५६ औँ वार्षिकोत्सव मनाउँदै छ ।
