हामी सबैकाे संसारन्यूज

१.
प्रेमको मीठो सुवास छर्थ्यौँ तिमी म कुनैबेला
अनि विश्वासको घडा भर्थ्यौं तिमी म कुनैबेला
अहिले तिमी बदलिएर अपरिचित भएका छौ,
सँगै जिउने मर्ने कुरा गर्थ्यौँ तिमी म कुनैबेला

२.
तिमीलाई अरुसँगै जुट्नु थियो भने
सम्बन्ध अलग्याएर फुट्नु थियो भने
मित्रताको डोरी बाट्न भन किन आयौ ?
बीचबाटोमै हुत्याएर छुट्नु थियो भने

३.
टुटेको मन लिएर अघि बढ्न खोजेको छु
बामे सारेरै खुड्किला चढ्न खोजेको छु
सके साथ दिनु तर निरुत्साहित नभरिदिनु
एकएक गर्दै भोगाईहरू पढ्न खोजेको छु

४.
अहम् भरिएको तिम्रो विचार समाउन सक्दिनँ
अहँ अरूलाई रुवाएर कदापि रमाउन सक्दिनँ
जेसुकै अभियोग हाल्नुस् म सहजै स्वीकार गर्छु
तर देशको रगत चुसेर सम्पत्ति कमाउन सक्दिनँ

५.
जातीयताको भजन निकै गाउनु भएछ
कुसंस्कार विरुद्ध मादल बजाउनु भएछ
जो अगुवा उही हगुवा उखान सुनेको थेँ
आजैदेखि घरमा नोकर खटाउनु भएछ