हामी सबैकाे संसारन्यूज

उ बल्नुपर्छ
उ जल्नुपर्छ
उसले घरलाई उज्यालो छर्न
हावा हुरी झेल्नुपर्छ
आफु पोलिनुपर्छ
किन कि उ छोरामान्छे ।

उसले रुनु हुँदैन
उ देखाएर रुदैन
तर
छोरीमान्छेले भन्दा बढि
छोरामान्छेले रुनुपर्छ ।

घरको दिपक उ
उ बलेर घर उज्यालो हुन्छ
त्यसैले
उसले झरी भन्न पाइदैन
घाम भन्न पाइदैन
उ अहोरात्र खट्नुपर्छ
चिराग भएर बल्नुपर्छ
किन कि उ छोरामान्छे ।

उ कहिले बाफिनुपर्छ
उ कहिले रापिनुपर्छ
खरानी किन नहोस्
उ हरबखत तातिनुपर्छ
उ चीसो भयो कि,
घरमा अभावले डेरा हाल्छ
छोरामान्छे भएकै कारण
उ सकि नसकि दन्किनुपर्छ ।

मानौं
छोरामान्छे मेसिन हो
जे काम गरेर
जस्तो काम गरेर
उसले गरगर्जो टार्नुपर्छ
मुस्किल समस्या हल गर्नुपर्छ ।

न कि कुनै स्वार्थ
बिलकुल निस्वार्थ
उ खट्नुपर्छ
उ खटिएर घरको चुलो बाल्नुपर्छ
नुनदेखि सुनसम्म
उ छोरामान्छेले पुर्याउनुपर्छ ।