हामी सबैकाे संसारन्यूज

कति आस ढले कति सास ढले
पर जीवन भो अनि लास ढले ।
रचियो अथवा कुन खेल यहाँ
किन कोभिड गर्दछ झेल यहाँ ।।१।

कति बास उठे कति प्राण छुटे
कति मर्म बुझी दिनरात जुटे ।
न त दीप न थप्दछ तेल यहाँ
किन कोभिड गर्दछ झेल यहाँ ।।२।

अतिसार भयो अनि हार भयो
जब रोग नयाँ अवतार भयो ।
न त सुक्दछ आँसु न भेल यहाँ
किन कोभिड गर्दछ झेल यहाँ ।।३।

दिन ढल्न पुगे रवि अस्त नभै
तन गल्न पुगे कवि व्यस्त छँदै ।
घर मानिस ठान्दछ जेल यहाँ
किन कोभिड गर्दछ झेल यहाँ ।।४।

अब दूर रहून् हर व्याधिहरू
चिर काल छ बाँच्नु त्यसै नमरूँ ।
चलखेल बढ्यो अति मेल यहाँ
किन कोभिड गर्दछ झेल यहाँ ।।५।

छन्द :तोटक