Sansar News
२४ असार, काठमाडौं । राष्ट्रिय प्रजातन्त्र पार्टी(राप्रपा)ले समान विचारधारा भएका समूह र व्यक्तिसँग एकता गर्ने निर्णय गर्दै वार्ता समिति गठन गरेको छ ।
एकता महाधिवेशनको मिति तोकेर कार्यतालिकासमेत बनाएको राप्रपाले यसबीचमा समान विचारधारा भएका समूह र व्यक्तिसँग एकता गर्ने निर्णय गर्दै ता बुद्धिमान तामाङको संयोजकत्वमा जगत गौचन र ऋषिबाबु परियार सदस्य रहेको वार्ता समिति गठन गरेको हो ।
पार्टीका अध्यक्ष त्रय कमल थापा, पशुपति शम्सेर राणा र डा प्रकाशचन्द्र लोहनीको उपस्थितिमा बसेको केन्द्रीय विशेष समितिको बुधबारको बैठकले उद्वव पौडेलको संयोजकत्वमा आर्थिक समिति समेत गठन गर्दै आर्थिक क्षेत्रसम्बन्धी अन्तरक्रिया कार्यक्रमको जिम्मेवारीसमेत दिइएको केन्द्रीय सचिवालय सदस्य भास्कर भद्राले जानकारी दिए।
त्यस्तै राप्रपाले बुद्धिजीविसँग अन्तरक्रिया गर्नका लागि भुवन पाठकको संयोजकत्वमा प्रा.डा.जयन्तनाथ खनाल र प्रा.डा.यादवप्रसाद ढुंगाना सदस्य रहेको आयोजक समिति गठन पनि गरेको छ ।
राप्रपाले आगामी कात्तिक २७ देखि ३० गतेसम्म काठमाडौंमा महाधिवेशन गर्ने निर्णय गरेको छ।
वि.सं.२०७८ असार २४ बिहीवार १९:३४ मा प्रकाशित
