हामी सबैकाे संसारन्यूज

असार २५, काठमाडौं । नेकपा (एमाले)का नेता टोपबहादुर रायमाझीले नेकपा (माओवादी केन्द्र) भूमिगत र छापामार शैलीमा चलिरहेको आरोप लगाएका छन् । शुक्रबार निर्वाचन आयोग पुगेका उनले यस्तो आरोप लगाएका हुन् ।

विगत ९ वर्षदेखि महाधिवेशन नभएका कारण माओवादी केन्द्र अवैध रहेको उनको भनाई छ । ‘माओवादी केन्द्र नेपालको संविधान, नेपालको कानुन र राजनीतिक दल सम्बन्धी ऐनअनुसार चलिरहेको छैन, एकप्रकारले भन्ने हो भने भूमिगत र छापामार किसिमले यो पार्टी चलिरहेको छ’, उनले भनेका छन्, ‘करिब २८, २९ वर्षसम्म यो पार्टीको कुनै महाधिवेशन भएको थिएन, एउटा महाधिवेशन भएको थियो २०६९ सालमा नाम मात्रैको, त्यसपछि २०७८ सालसम्म अर्को महाधिवेशन त्यो पार्टीले गरेको छैन ।’

उनले अवैधानिक पार्टीले वैधानिक जनप्रतिनिधिलाई कारबाही गर्न नमिल्ने पनि जिकिर गरेका छन् । जनताबाट प्रत्यक्ष निर्वाचिन जनप्रतिनिधिहरुलाई अवैधानिक पार्टीले कसरी कारबाही गर्न मिल्छ ? उनको प्रश्न छ ।

उनले भनेका छन्, ‘एमाले, माओवादीको एकतालाई शून्य समय मानेपनि करिब ७ वर्ष भयो । राजनीतिक दलसम्बन्धी ऐनमा प्रत्येक ५ वर्षमा महाधिवेशन गर्नुपर्ने भनेको छ । उसले आफ्नो अद्यावधिक गर्न सकिरहेको छैन । त्यस्तो अवैधानिक पार्टीले वैधानिक जनप्रतिनिधिलाई कारबाही गरियो । संघीय सांसद, प्रदेश सांसद, स्थानीय तहका जनप्रतिनिधि, जनताबाट प्रत्यक्ष चुनिएका वैधानिक जनप्रतिनिधिलाई अवैधानिक पार्टीले कारबाही गर्ने ?’

शुक्रबार नेता रायमाझीसँगै माओवादी केन्द्रका पूर्व नेताहरु मणि थापा, प्रभु साहलगायत निर्वाचन आयोगमा पुगेका थिए । उनीहरुले माओवादी केन्द्र खारेजी गर्न माग गर्दै गरिएको निवेदन तत्कालै कारबाही प्रक्रियामा लैजान माग गरेका थिए ।