हामी सबैकाे संसारन्यूज

३१ असार, काठमाडौँ । प्रधानमन्त्री शेरबहादुर देउवालाई एकलौटी रुपमा अगाडि नबढ्न सत्तारुढ गठबन्धनका शीर्ष नेताहरुले आग्रह गरेका छन् ।

नेपाली कांग्रेसका सभापति शेरबहादुर देउवा प्रधानमन्त्री भएपछि पहिलोपटक सिंहदरबारस्थित प्रधानमन्त्री तथा मन्त्रिपरिषदको कार्यालयमा बिहीबार अपरान्ह बसेको बैठकमा नेताहरुले उक्त आग्रह गरेका हुन् ।

छलफलमा सहभागी दलका शीर्ष नेताहरूले एकलौटी रुपमा अगाडि नबढ्न, संवाद गरेर मात्र सबै विषयमा निर्णयमा प्रधानमन्त्रीलाई आग्रह गरेका थिए । उनीहरुले प्रधानमन्त्री देउवालाई नेपाली जनताको अपेक्षा ठूलो रहेको भन्दै निवर्तमान प्रधानमन्त्री केपी शर्मा ओलीले गरेको गल्ती नदोहोर्याउन सुझाव दिएका थिए ।

उक्त छलफलमा सत्तारुढ गठबन्धनले हालसम्मको राजनीतिक घटनाक्रमको समीक्षा गरेको छ । बैठकमा सरकार सञ्चालनलगायत विभिन्न विषयमा केन्द्रित रहेर छलफल गरिएको कांग्रेसका महामन्त्री पूर्णबहादुर खड्काले बताए ।

नेताहरुले सबै नेपाली जनतालाई चाँडै भ्याक्सिन उपलब्ध गराउन फास्ट ट्रयाकमा काम गर्न सरकारलाई सुझाव दिएका थिए । साथै उनीहरुले बाढी पहिरोले पु¥याएको क्षति बारे बुझेर छिटो राहत पु¥याउने विषयमा सरकार गम्भिर हुन सुझाव दिएका थिए ।

प्रधानमन्त्री देउवाले गठबन्धनको निर्णयलाई आत्मसाथ गरेरै अघि बढ्ने प्रतिबद्धता जनाएको महामन्त्री खड्काले जनाए ।

उक्त बैठकमा प्रधानमन्त्री शेरबहादुर देउवा, नेकपा माओवादी केन्द्रका अध्यक्ष पुष्पकमल दाहाल, जनता समाजवादी पार्टीका अध्यक्ष उपेन्द्र यादव, राष्ट्रिय जनमोर्चाका अध्यक्ष चित्रबहादुर केसी सहभागी थिए । एमाले वरिष्ठ नेता माधवकुमार नेपाल आफू सहभागी नभएपनि उनको पक्षबाट डा. विजय पौडेल सहभागी थिए । त्यस्तै बैठकमा बैठकमा माओवादी केन्द्रका नेता कृष्णबहादुर महरा, कांग्रेसका महामन्त्री पूर्णबहादुर खड्का पनि उपस्थित थिए ।

(तस्विर : पुष्पकमल दाहाल प्रचण्डको सचिवालय)