Sansar News
साउन १३, काठमाडौं । नेकपा (माओवादी केन्द्र) खारेजीको माग गर्दै निर्वाचन आयोगमा धाएका नेकपा (एमाले)का नेताहरु फेरि सांसद पदमा पुनर्बहालीको माग गर्दै सर्वोच्च अदालत पुगेका छन् । एमालेका नेताहरु बुधबार पुनर्बहालीको माग गर्दै सर्वोच्च पुगेका हुन् ।
नेपाल कम्युनिष्ट पार्टी (नेकपा) विघटन गर्दै एमाले र माओवादी केन्द्र ब्यूँताउने सर्वोच्चको निर्णयपश्चात उनीहरु एमाले तिर लागेका थिए । एमाले लागेका उनीहरुलाई माओवादी केन्द्रले कारबाही गरेको थियो ।
माओवादी केन्द्रले कारबाही गरेको झण्डै ४ महिनापछि उनीहरु सर्वोच्च पुगेका हुन् ।
नेता टोपबहादुर रायमाझीको नामबाट दिइएको रिटमा माओवादी केन्द्र, केन्द्रका अध्यक्ष पुष्पकमल दाहाल ‘प्रचण्ड’, निर्वाचन आयोग, संसद सचिवालय, प्रतिनिधि सभाका सभामुख अग्निप्रसाद सापकोटालगायतलाई विपक्षी बनाएर उत्प्रेषणयुक्त परमादेशको माग गरिएको छ । सर्वोच्चले रायमाझीको रिटलाई बिहीबारका लागि पेसीमा चढाएको छ ।
वि.सं.२०७८ साउन १३ बुधवार १५:११ मा प्रकाशित
