Sansar News
१३ साउन, काठमाडौं । रिलायबल नेपाल लाइफको सीईओ नारायणबाबु लोहनीको कार्यकाल थप गर्न बिमा समितिले स्वीकृति दिएको छ ।
साउन १ गते बसेको संचालक समितिको बैठकले प्रमुख कार्यकारी अधिकृत (सीईओ) लोहनीको कार्यकाल थप गर्ने निर्णय गरेको थियो ।
कम्पनीले सीईओ लोहनीको कार्यकाल थप गर्दै स्वीकृतिका लागि बीमा समितिमा पत्र पठाएको थियो । बीमा समितिले लोहनीलाई सिईओ नियुक्त गर्न स्वीकृति दिएको हाे ।
सीइओ लोहनीको पहिलो ४ बर्षे कार्यकाल साउन १७ गते सकिँदैछ । कार्यकाल सकिनुअघि नै बीमा समितिले स्वीकृति दिएसँगै लोहनी थप ४ बर्षका लागि सिइओको जिम्मेवारीमा रहने भएका हुन् । उनले साउन १८ गतेबाट दोस्रो कार्यकाल सुरु गर्नेछन् ।
रिलायबल आउनु अगाडि लोहनी बैंक वित्तीय संस्थामा संलग्न थिए । स्थापनाकाल देखि नै कम्पनीको प्रमुख कार्यकारी अधिकृत सम्हालेका लोहनीले आफ्नो नेतृत्वमा कम्पनीलाई उत्कृष्ट बनाउन सफल भएका छन् ।
सिभिल इन्जिनियर लोहनीले व्यस्थापनमा स्नातकोत्तरको अध्ययन गरेका छन् । उनीसँग एम टेक इन्जिनियरिङ एण्ड कन्सल्टेन्सी सर्भिस र बैंक वित्तीय संस्था र बीमा कम्पनीमा २ दशक काम गरेको अनभव छ ।
वि.सं.२०७८ साउन १३ बुधवार १६:१८ मा प्रकाशित
