हामी सबैकाे संसारन्यूज

साउन १५, काठमाडौं । लुम्बिनी प्रदेशका मुख्यमन्त्री शंकर पोखरेललाई सघाउने जनता समाजवादी पार्टी (जसपा)का तीन सांसद पदमुक्त भएका छन् । जसपाको निर्णयअनुसार प्रदेश सभा सचिवालयले शुक्रबार उनीहरु पदमुक्त भएको सूचना जारी गरेको हो ।

पदमुक्त हुनेमा जसपाको महन्थ ठाकुर पक्षका सांसदहरु सन्तोषकुमार पाण्डेय, विजयबहादुर यादव र कल्पना पाण्डेय छन् ।

जसपाको बहुमत पक्षको निर्देशन विपरित एमाले नेतृत्वको सरकारको पक्षमा मतदान गरेका उनीहरुलाई जसपाले गत असार ३ मा स्पष्टीकरण सोधेको थियो । उनीहरुलाई जसपाले सरकारबाट फिर्ता हुन निर्देश गरेको थियो । तर, उनीहरु जसपाको निर्देशन विपरित सरकारमा सहभागि भईरहेका थिए ।

उपेन्द्र यादव पक्षले पार्टीको आधिकारिकता पाएसँगै पार्टी निर्देशन विपरित सरकारमा सहभागी हुने उनीहरुलाई कारबाही गर्ने निर्णय गरेको थियो । बिहीबार मात्रै प्रदेश सभालाई पत्र लेख्दै जसपाले पदमुक्त गर्न आग्रह गरेको थियो ।