Sansar News
२० साउन, काठमाडौँ । जडीबुटीको अध्ययन र अनुसन्धानमा लागेका आचार्य बालकृष्णको जन्मोत्सव आज सातै प्रदेशमा विभिन्न जडीबुटीका बिरुवा रोपेर मनाइँदै छ ।
स्याङ्जा जिल्लामा जन्मृेका उनले भारतमा योग एवं आयुर्वेदको प्रचारप्रसारमा योगदान पुर्याएका योग गुरु रामदेवसँग सहकार्य गरी जडीबुटीका औषधि बनाउन सहयोग गर्दै आएका छन्। नेपालका सबैजसो जिल्लामा खुलेका पतञ्जलि योग समितिमार्फत योग र आयुर्वेदको प्रचारप्रसारमा पनि आचार्य बालकृष्णको योगदान छ ।
यस अवसरमा पतञ्जलि समितिले देशभर विभिन्न कार्यक्रम आयोजना गर्ने भएको छ । आजका दिनलाई जडीबुटी दिवसका रुपमा मनाउनाका साथै सात प्रदेशका ३५ जिल्लामा गुर्जो, पत्थरचट्टा, बाह्रमासे फूल, पारिजात, लेमनग्रास, तुलसीलगायत जडीबुटी रोपण गरिने अभियानकर्मी कमलबहादुर राजलवटले जानकारी दिए ।
सो अवसरमा गुर्जोको चिया र यसबाट बनेको धुलो औषधि पनि निःशुल्क वितरण गरिने जनाइएको छ । बुधबार एक हजार पाँच सय यस्ता जडीबुटीजन्य बिरुका रोप्नका लागि पठाइएको उनले बताए । यसैगरी समितिले पनि अरू थप जडीबुटीका बिरुवा रोप्ने भएको छ ।
प्रत्येक वर्ष अगष्ट ४ का दिन आचार्य बालकृष्णले जन्मोत्सव मनाउने गरेका जनाइएको छ । यस वर्ष आजका दिन कामिनी एकादशी व्रत पनि परेकाले विशेषरुपमा तुलसी रोपणलाई प्राथमिकता दिइएको गुर्जो अभियानकर्मी राजलवटले जानकारी दिए ।
वि.सं.२०७८ साउन २० बुधवार १३:०० मा प्रकाशित
